މެޑިސިން ކިޔަވާކުދިންނަށް ދަރުމަވަންތަ ހޮސްޕިޓަލުން އަލުން ޖާގަދެއްވާނެ ކަމުގެ ފެހި ސިގުނަލް ރައީސް އޮފީހުން ދީފި

ދަރުމަވަންތަ ހޮސްޕިޓަލްގެ އިމާރާތުގެ ދެ ފަންގިފިލާ ކުރިއެކޭ އެއްގޮތަށް ރާއްޖޭގެ ގައުމީ ޔުނިވަސީޓީ (އެމްއެންޔޫ) މެޑިސިން ކިޔަވާ ދަރިވަރުންނަށް ބޭނުން ކުރެވޭނެ ކަމުގެ އުންމީދު އާވެފައި ވާކަމަށް އެ ޔުނިވާސިޓީގެ ދަރިވަރުންގެ ޔޫނިއަން ބުނެފި އެވެ. ރައީސް އޮފީހާ އެކު ބޭއްވި ބައްދަލުވުމަށް ފަހު އާންމު ކުރި ބަޔާނުގައި ދަރިވަރުންގެ ޔޫނިއަން ބުނެފައި ވަނީ މި މަޝްވަރާގައި ރައީސް އޮފީހުގެ އިސް ބޭފުޅުންނާއި، އައިޖީއެމްއެޗް އަދި އެމްއެންޔޫޫ ބައިވެރިވި ކަމަށެވެ. އަދި މި ބައްދަލުވުވުމުގައި ސަރުކާރުން މެޑިސިން ކިޔަވާ ދަރިވަރުންގެ ކިޔެވުމަށް ހުރަސް އެޅޭނެ ގޮތަކަށް އެއްވެސް ކަމެއް ނުހިންގާނެ ކަމުގެ ޔަގީންކަން ދިން ކަމަށެވެ. ބަޔާނުގައި ބުނެފައި ވަނީ ދަރިވަރުންގެ ހައްގުތައް ރައްކާތެރިކުރުމުގައި ރައީސުލްޖުމްހޫރިއްޔާ ބައިވެރިވެވަޑައިގެން، އެކަަމަށް އިސްކަން ދެއްވާކަމާއި، މިހާރަވަށްވުރެ ފުރިހަމަ ފެސިލިޓީއެއް ގާއިމްކޮށްދެއްވާނެ ކަމުގެ ޔަގީންކަން ދިން ކަމަށެވެ. އަދި ސިއްހީ ދާއިރާއަކީ ރައީސުލްޖުމްހޫރިއްޔާ ވަރަށް ބޮޑަށް އިސްކަމެއް ދެއްވައިގެން ކުރިއަރުވަން ބޭނުންވާ ދާއިރާއެއްކަން ފާހަގަކުރެއްވި ކަމަށެވެ. ޔޫނިއަން ބުނި ގޮތުގައި ބައްދަލުވުމުގައި ކުރެވުނު މަޝްވަރާއާއި ބައްދުވުމުގައކ ސަރުކާރުން ވަނީ ދަރިވަރުންނަށް ދެރަގޮތެއް ނުވާނެ ކަމުގެ އުއްމީދު ދީފަ އެވެ. މިއީ އެތައް ދަރިވަރުންނެއްގެ މަސްލަހަތު ހިމެނޭ ކަމަކަށްވުމާއި އެކު، މެޑިސިން ކިޔަވާ 200 އަށް ވުރެ ގިނަ ދަރިވަރުންނަށް ދާއިމީ ހިޔާވަހިކަމެއް ލިބެންދެން ދަރުމަވަންތަ ހޮސްޕިޓަލުގެ 8 އަދި 14 ވަނަ ފަންގިފިލާފައި ތިބުމުގެ އުންމީދު އާވެފައިވާކަމަށް ވެސް ދަރިވަރުންގެ ޔޫނިއަން ފާހަގަ ކުރި އެވެ.