އާސަންދަ ކުންފުނި އިސްލާހުކުރުމުގެ މަސައްކަތް ފަށަނީ

ދައުލަތަށް ބުރަބޮޑު އަދި އިސްރާފު ގިނަ އާސަންދަ ކުންފުނި އިސްލާހުކުރުމުގެ މަސައްކަތް ފައްޓަވާނެ ކަމަށް މާލީ ވަޒީރު ޑރ. މުޙައްމަދު ޝަފީގު ވިދާޅުވެއްޖެއެވެ. ޕަބްލިކް ސާވިސް މީޑިޔާ ނިއުސް އަށް ދެއްވި ޚާއްސަ އިންޓަވިއުއެއްގައި ޑރ. ޝަފީގު ވިދާޅުވެފައި ވަނީ ދައުލަތަށް ލިބޭ އާމްދަނީ ޚަރަދު ކުރަން ވާނީ ޒިންމާދާރުކޮށް ޚަރަދު ކުޑަކޮށެެވެ. އެހެންކަމުން ދެމެހެއްޓެނިވި ގޮތެއްގައި ކުރިއަށް ދިއުމަށްޓަކައި އާސަންދަ ނިޒާމު އިސްލާޙު ކުރުމަކީ އެއީ މިވަގުތަށް ކުރުން މުހިންމު ކަމެއްގެގޮތުގައި ވަޒީރު ފާހަގަކުރެއްވިއެވެ. "އާސަންދައަކީ ވަރަށް މުހިންމު ޕްރޮގްރާމެއް. ވަރަށް ގިނަ ރައްޔިތުންތަކަށް ފައިދާކުރޭ. އެކަމު އަޅުގަނޑުމެން އެންމެންވެސް ޤަބޫލުކުރަންޖެހޭ އާސަންދައިގެ ކަންތައް ދަނީ އެންމެ ރަނގަޅަށް ނޫންކަން. އިސްރާފް ވަރަށް ބޮޑު. އާސަންދައަށް ދޭ ބަޖެޓު އަހަރުން އަހަރަށް ޑަބަލް ވަމުން އެދަނީ. އެއް ބިލިއަނަށް ބަޖެޓުކުރާ ޚަރަދު 2 ބިލިއަށް އަރާ. 2 ބިލިއަން ބެޖެޓުކުރީމަ 4 ބިލިއަން ޚަރަދުތައް އަރައިގެންދޭ. އެއީ ރައްޔިތުންބޭނުންވާ ގޮތެއް ނޫން." މާލީ ވަޒީރު ވިދާޅުވެފައި ވެއެވެ. އޭނާ ވިދާޅުވިގޮތުގައި އާސަންދަ އާއެކު ދައުލަތުގެ އެހެން ކުންފުނިތައް އިސްލާހުކުރުމުގެ އިތުރުން ދައުލަތުން ސަބްސިޑީ ދިނުމުގެ އުސޫލަށްވެސް ބޮޑެތި ބަދަލުތަކެއް ވަނީ ގެންނަން ޖެހިފައެވެ.