މެމްބަރު ޒަރީރަށް ހަމަލާދިން މައްސަލާގައި 2 މީހަކު ހައްޔަރުކޮށްފި

ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ހަސަން ޒަރީރަށް ހަމަލާދިން ކަމުގެ ތުހުމަތުގައި 2 މީހުން ހައްޔަރުކޮށްފިއެވެ. ފުލުހުން ބުނީ މި މައްސަލައާއި ގުޅިގެން މި މަހުގެ 11 ވަނަ ދުވަހުގެ ރޭ ކޯޓް އަމުރެއްގެ ދަށުން ދިވެހި ދެ ފިރިހެނަކު ހައްޔަރުކޮށްފައިވާ ކަމަށެވެ. މިމައްސަލައާ ގުޅިގެން ހައްޔަރުކޮށްފައިވަނީ 21 އަހަރުގެ ޒުވާނަކާއި 22 އަހަރުގެ ޒުވާނެކެވެ. އެ ދެ މީހުންގެ ބަންދަށް ކްރިމިނަލް ކޯޓޫން އިއްޔެ ވަނީ 15 ދުވަހުގެ މުއްދަތެއް ޖަހާފައެވެ. ފުލުހުން ބުނީ އެ މައްސަލަ އިތުރަށް ތަހުގީގު ކުރަމުން އަންނަ ކަމަށެވެ. މީގެ ހަތަރު ދުވަސް ކުރިން މެމްބަރު ޒަރީރަށް ހަމަލާ ދިނީ ބުރުޒުމަގުގައި ހުންނަ ހަބީބީ ކެފޭގައި އިންނަވަނިިކޮށް އެރޭ ފަތިހުގެ ވަގުތެއްގައެވެ. މަރުތޭލަކުން ދިން މިހަމަލާގައި ޒަރީރުގެ ބޯ ފަޅައިގެންގޮސް ދިއުމުގެ ސަބަބުން ހޮސްޕިޓަލުން ވަނީ ފަރުވާ ހޯދާފައެވެ.