ވިލިނގިލީގައި ޖިންސީގޯނާގެ މައްސަލައިގައި 3 މީހަކު ހައްޔަރުކޮށްފި

ގއ. ވިލިނގިލީގައި އަންހެނަކަށް ޖިންސީގޯނާ ކުރި މައްސަލައެއްގައި ތިން މީހަކު ހައްޔަރު ކޮށްފިއެވެ. ފުލުހުން ބުނީ އުމުރުން 22 އަހަރުގެ އަންހެނަކަށް ޖިންސީ ގޯނާ ކޮށްފައިވާ މައްސަލައެއް މިދިޔަ ހުކުރު ދުވަހުގެ ރޭ ފުލުހުންނަށް ރިޕޯޓްކޮށްފައިވާ ކަމަށެވެ. އެގޮތުން "މިނިވަން" އަށް މައުލޫމާތު ދެމުން ފުލުހުންގެ މީޑިއާ އޮޕިޝަލެއް ވިދާޅުވީ އެ މައްސަލާގައި ކޯޓު އަމުރެއްގެ ދަށުން ތިން ފިރިހެނުން ރޭ ހައްޔަރު ކޮށްފައިވާ ކަމަށެވެ. އެއީ އުމުރުން 20 އަހަރާއި 24 އަހަރާއި 30 އަހަރުގެ ދިވެހި ތިން މީހުން ކަމަށް ފުލުހުން މައުލޫމާތު ދެއެވެ. އެނގިފައިވާ ގޮތުގައި އޭގެ ތެރެއިން ދެ މީހުން ނިސްބަތް ވަނީ ވިލިނގިލި އަށެވެ. އަނެއް މީހާ އަކީ ލ. އަތޮޅު މީހެކެވެ. އަދި އެ އަންހެން މީހާ އަކީ އެ އަތޮޅު ކޮލަމާފުށީ އަންހެނެއްކަން ވެސް ވަނީ މައުލޫމާތު ލިބިފައެވެ.