ވައިކަރަދޫއަށް ފޮނުވި ޖަނަރޭޓަރު، މާދަމާގެ ވަގުތެއްގައި އިންސްޓޯލްކުރުމުގެ މަސައްކަތް ފެށޭނެ: ފެނަކަ

ހދ.ވައިކަރަދޫ ގައި ދިމާވެފައިވާ ކަރަންޓުގެ މައްސަލައަށް ހައްލެއް ހޯދުމަށް ކުރެވެމުންދާ މަސައްކަތުގެ ތެރެއިން އެރަށަށް ބޭނުންވާ އާ ޖަނަރޭޓަރު މިހާރު ފޮނުވާފައިވާކަމަށް ފެނަކައިން ބުނެފިއެވެ. ފެނަކަ އިން ބުނީ، އެރަށަށް ފޮނުވަނީ 250ކވ ގެ ޖަނަރޭޓާރެއް ކަމަށާއި އެ ޖަނަރޭޓަރު އެރަށަށް ފޮނުވާފައިވާއިރު، އިންސްޓޮލޭޝަންގެ މަސައްކަތް މާދަމާ ކުރެވޭނެ ކަމަށެވެ. މި ދަނޑިވަޅުގައި އެ ރަށުގެ ރައްޔިތުންނަށް ދިމާވަމުންދާ ދަތި އުނދަގޫތަކަށް އެ ކުންފުނިން ވަނީ މާއާފަށް އެދިފައެވެ. އަދި ވައިކަރަދޫގެ ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް އެ ކުންފުނިން ވަނީ ޝުކުރު އަދާކޮށްފައެވެ. https://twitter.com/TeamFenaka/status/1771148631149822130 ވައިކަރަދުއަށް ކަރަންޓް ދެމުން އަންނަ އެ ރަށު ފެނަކަ ބްރާންޗްގެ ޖެނެރޭޓަރެއް ހަލާކުވެ، ރަށުން ކަރަންޓް ކެނޑެންފެށިތާ މިއަދަށް މިވީ ފަސް ދުވަހެވެ. އެހެން ކަމުން އެކަމަށް ހައްލު ނުލިބި ލަސްވުމުގެ ސަބަނުން ރަށުގެ ގިނަބަޔަކު ވަނީ މުޒާހަރާ ވެސް ކޮށްފައެވެ. މިކަމާއި ގުޅޭގޮތުން އެކްސްގައި ކުރެއްވި ޕޯސްޓެއްގައި ފެނަކަ ކޯޕަރޭޝަނުގެ މެނޭޖިންގ ޑިރެކްޓަރު މުއާޒް ރަޝީދު ވިދާޅުވީ، ވައިކަރަދޫގެ އިތުރުންވެސް މިވަގުތައް ޖަނަރޭޓަރު ބޭނުންވާ ފަސް ރަށަކަށް ޖަނަރޭޓަރު ފޮނުވުމުގެ މަސައްކަތް ކުރަމުންދާކަމަށެވެ. މިގޮތުން ގދ. ހޯޑެއްދޫއަށް ފޮނުވި 400 ކިލޯވޮޓްގެ ޖަނަރޭޓަރު އެރަށަށް ގެންގޮސް މިހާރު އިންސްޓޯލްކުރުމުގެ މަސައްކަތް ފަށާފައިވާކަން އޭނާ ފާހަގަކުރެއްވިއެވެ. https://twitter.com/muazmr/status/1771172498945826929 ރޯދަމަހަކީ އާއްމު މަސްމަހާ ހިލާފަށް ކަރަންޓް ގިނައިން ބޭނުންކުރާ މަހަކަށްވުމުން ބައެއް ރަށްރަށުގައި ކަރަންޓް ބޭނުންކުރާވަރު އިތުރުވުމުން އިންޖީނަށް ބާރުބޮޑުވެ ކަރަންޓް ކަނޑައިގެން ދިއުމުގެ މައްސަލަތައް ދަނީ ކުރިމަތިވަމުންނެވެ.