ޓޫރިޒަމް ރަނގަޅު، ޗައިނާ އެކަމަކު އަދިވެސް 8 ވަނައިގައި

ޗައިނާގެ ޓޫރިސްޓުން ރާއްޖެއަށް ދަތުރުކުރަން ފަށާތާ މަދު ހަފުތާ ތަކެއްގެ ތެރޭގައި އެގައުމަކީ އަނެއްކާ ވެސް ރާއްޖޭގެ ޓޮޕް މާކެޓަކަށް ވާނެ ކަމަށް ބެލި ނަަމަވެސް އެގައުމުން ޓޫރިސްޓުން އަންނަ ވަރު، މާޗް މަސް ނިންމައިލި އިރު މާބޮޑަށް އިތުރެއް ނުވި އެވެ. ޓޫރިޒަމް މިނިސްޓްރީން މިއަދު އާއްމުކުރި ތަފާސް ހިސާބުތަކުގައިވާ ގޮތުން ރާއްޖެއަށް އެންމެ ގިނަ ޓޫރިސްޓުން އައި 10 ގައުމުގެ ލިސްޓްގައި ޗައިނާ އަދި ވެސް އޮތީ އަށް ވަނައިގަ އެވެ. އެއީ އެގައުމުގެ ޓޫރިސްޓުން އަންނަން ފެށިތާ ދެހަފްތާއެއްހާ ދުވަހުގެ ތެރޭގައި އެރި ހިސާބެކެވެ. ހިސާބުތަކުގައިވާ ގޮތުން ޗައިނާއިން މިދިޔަ މާޗް މަހު ރާއްޖެއަށް އައީ ޖުމްލަ 16،925 ޓޫރިސްޓުންނެވެ. އެއީ  މި މުއްދަތުގައި ރާއްޖެއަށް ޒިޔާރަތްކުރި ޓޫރިސްޓުންގެ 3.3 ޕަސެންޓެވެ. މިއީ ފެބްރުއަރީ މަހު އެގައުމުން ރާއްޖެއަށް ޓޫރިސްޓުން ޒިޔާރަތްކުރި އަދަދާއި އަޅައި ބަލާއިރު ނިސްބަތުން ކުޑަ ކުރި އެރުމެކެވެ. ފެބްރުއަރީ މަހު އެގައުމުން ރާއްޖެއަށް 9،995 ޓޫރިސްޓުން ޒިޔާރަތްކުރި އެވެ. އެއީ އެ މަހު ރާއްޖެއަށް ޒިޔާރަތްކުރި ޓޫރިސްޓުންގެ 2.9 ޕަސެންޓެވެ. [embed]https://twitter.com/MoTmv/status/1642094237968896001?s=20[/embed] ޓޫރިޒަމް މިނިސްޓްރީން ލަފާކޮށްފައި އޮތީ ޗައިނާ ޓޫރިސްޓުން އަންނަން ފަށާތާ މަދު ހަފްތާތަކެއްގެ ތެރޭގައި އެގައުމު ހަތް ވަނަ އަށް އަރާނެ ކަަމަށެވެ. އެހެން ނަމަވެސް ރާއްޖޭގެ ޓޮޕް މާކެޓްތަކުގެ ހަތް ވަނައިގައި އަދި ވެސް އޮތީ އެމެރިކާ އެވެ. މާޗްމަހު އެގައުމުން ރާއްޖެއަށް 21،439 ޓޫރިސްޓުން އަ އެވެ.

ޖުމްލަކޮށް ޓޫރިޒަމް ރަނގަޅު

ކޮވިޑް-19 ގެ ބަލިމަޑުކަން އައުމުގެ ކުރިން އެއް ގައުމަކުން ރާއްޖެއަށް އެންމެ ގިނަ ޓޫރިސްޓުން އައި ޗައިނާއިން ޓޫރިސްޓުން އަންނަ ވަރު މާބޮޑަށް އިތުރު ނުވިޔަސް، ޓޫރިޒަމް މިނިސްޓްރީގެ ހިސާބުތައް ދައްްކާ ގޮތުން ރާއްޖޭގެ ޓޫރިޒަމް މިދިޔަ މަހު ވެސް ޖުމްލަކޮށް ރަނގަޅެވެ. އެ ހިސާބުތަކުގައިވާ ގޮތުން މާޗްމަހުގެ ފުރަތަމަ ދުވަހުން ފެށިގެން 29 ވަނަ ދުވަހާ ހަމައަށް ރާއްޖެއަށް ޖުމްލަ 163،381 ޓޫރިސްޓުން އަ އެވެ. އެ މަހުގައި ދުވާލަކު އެވްރެޖްކޮށް 5،634 ޓޫރިސްޓުން ރާއްޖެއަށް ޒިޔާރަތްކުރި ކަމަށް ވެސް އެ ހިސާބުތަކުން ދައްކަ އެވެ. މިއަހަރުގެ މިހައިތަނަށް ރާއްޖެއަށް ޒިޔާރަތްކުރި ޓޫރިސްޓުންގެ އަދަދަކީ ޖުމްލަ 513،795 އެވެ. މިއީ މިދިޔަ އަހަރުގެ މި މުއްދަތާ އަޅައި ބަލާއިރު 21 ޕަސެންޓްގެ ކުރި އެރުމެކެވެ.