ޓޫރިޒަމް ދާއިރާއާ ގުޅޭ ގޮތުން ހަދާ ޤާނޫނާއި ޤަވާއިދުތަކުން ފަހިކޮށްދޭން ޖެހޭނީ އެ ދާއިރާގެ ތަރައްގީ ކަމަށާއި، އެއްވެސް ހާލެއްގައި އެ ޤާނޫނުތަކާއި ޤަވާއިދު ތަކަކީ އުނދަގުލަކަށް ވެގެން ނުވާނެ ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ ސެކްރެޓަރީ ޖެނެރަލް އަދި ކްރައުން ކުންފުނީގެ އެއް ހިއްސާދާރު އަހުމަދު ނަޒީރު ވިދާޅުވެއްޖެ އެވެ.
ކުރުނބާ މޯލްޑިވްސްގައި ބޭއްވި މަޓީގެ 35 ވަނަ އަހަރީ އާންމު ޖަލްސާގައި ވާހަކަދައްކަވަމުން ނަޒީރު ވިދާޅުވީ ޓޫރިޒަމް މިނިސްޓްރީ އެ ގޮތުގައި ކުރިއަށް ގެންދިއުމަށްޓަކައި ރާއްޖެ އަމާންކޮސް ބޭއްވުމަށް ސަރުކާރަށް ދަންނަވާ ކަމަށާއި، ޓޫރިޒަަމަށް އެންމެ މުހިންމީ ޔަގީން ކަމާއި އަމާން މާހައުލެއް އޮތުން ކަމަށެވެ.
ނަޒީރު ގެ ވާހަކަފުޅުގައި އިތުރށް ފާހަގަކުރެއްވީ މިދިޔަ އަހަރު ޓޫރިޒަމަށް ދަތިތައް ކުރިމަތިވި ނަމަވެސް، ކާމިޔާބީތަކެއް ވެސް ހާސިލްކުރެވިފައިވާ ކަމަށާއި އެގޮތުން މިދިޔަ އަހަރުގެ ޓްރެވެލް ރިސިޓް 5.6 ބިލިއަން ޑޮލަރަށް އަރާއިރު ޓްރެވެލް ރިސިޓުގެ 83.6 ޕަސެންޓު ހިއްސާކުރަނީ ރިސޯޓުތައް ކަމަށެވެ. އަދި ދައުލަތަށް ވަންނަ އާމްދަނީގެ 95 ޕަސެންޓު މިދިޔަ އަހަރު ހޯދައިދިނީ ޓޫރިޒަމް ސެކްޓަރުން ކަމަށްވެސް ވިދާޅުވިއެވެ.
