ޓޮބްލެރޯން ޗޮކުލެޓްގައި ޕްލާސްޓިކް ހުރެގެން، ބޭނުންކުރުން މަނާކޮށްފި

ރާއްޖޭގައި މަޝްހޫރު ޗޮކްލެޓެއް ކަމަށްވާ ، ޓޮބްލެރޯން ގެ ޗޮކްލެޓެއް ޕްލާސްޓިކް އިން ތަޣައްޔަރުވެފައިވާތީ، ބޭނުންނުކުރުމަށް، މޯލްޑިވްސް ފުޑް އެއްޑް ޑްރަގް އޮތޯރިޓީއިން އަންގައިފިއެވެ. އެމްއެފްޑީއޭ އިން ބުނީ ޕްލާސްޓިކް އިން ތަގައްޔަރުވެފައިވާ ސްވިޒަލެންޑްގެ ޓޮބްލެރޯން ބްރޭންޑުގެ މިލްކް ޗޮކްލެޓް ދިވެހި ރާއްޖެއަށް އެތެރެވެފައިވާކަމުގެ މައުލޫމާތު ޔޫރަޕްގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑް އަދި ދުނިޔޭގެ ސިއްހަތު ޖަމިއްޔާގެ އިންޓަނޭޝަނަލް ފުޑް ސޭފްޓީ އޮތޯރިޓީސް ނެޓްވާކް މެދުވެރިކޮށް އެ އޮތޯރިޓިއަށް އަންގާފައިވާ ކަމަށެވެ. އެއީ އެ ޗޮކުލެޓް އުފައްދާ މެށިނަށް ދިމާވި މައްސަލައަކާ ގުޅިގެން ވީ ކަމެއްކަމަށް ވެސް އެ އޮޓޯރިޓީއިން ބުންޏެވެ. ތަގައްޔަރު ވެފައިވާ އެ ޗޮކުލެޓްގެ ސަބަބުން ޕްލާސްޓިކް ކޮޅެއް ކަރުގައި ތާށިވުން، ދަތަށް ގެއްލުންވުން ފަދަ ކަމެއް ދިމާވުމުގެ ފުރުސަތު އޮވެދާނެކަމަށް ވެސް އެ އޮތޯރިޓީއިން ބުންޏެވެ. އެހެންވެ، ރައްކާތެރި ވުމުގެ ގޮތުން އެ ޗޮކުލެޓް ރާއްޖެއަށް އެތެރެނުކުރުމަށާއި ނުވިއްކުމަށް އެ އޮތޯރިޓީއިން ވަނީ އަންގާފައެވެ.