ދައުރު ނިމުމުގެ ކުރިން ސަރުކާރުގެ ހުރިހާ ޚިދުމަތެއް ޑިޖިޓަލް ކުރާނަން: ރައީސް ޑރ.މުއިއްޒު

ދައުރު ނިމުމުގެ ކުރިން ސަރުކާރުގެ ހުރިހާ ޚިދުމަތެއް ޑިޖިޓަލް ކުރާނެކަމަށް ރައީސް ޑރ.މުއިއްޒު ވިދާޅުވެއްޖެއެވެ. ދައުލަތުގެ މީޑިއާ އަށް ދެއްވި ބަސްދީގަތުމެއްގައި ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވީ މި ދައުރުގެ ތެރޭގައި ތައުލީމީ ދާއިރާއާއި ސިއްހީ ދާއިރާ ހިމެނޭ ގޮތަށް ސަރުކާރުގެ ހުރިހާ ހިދުމަތެއް ޑިޖިޓަލް ކުރާނެ ކަމަށާއި، ދުނިޔެ އަށް އަންނަ ތަރައްގީތައް ބަލައިގަންނަން ޖެހޭ ކަމަށާއި އެގޮތުން ކުރިއަށް އޮތް ތަނުގައި އާޓިފިޝަލް އިންޓެލިޖެންސަކީ ވަރަށް މުހިއްމު ދައުރެއް އަދާކުރާނެ އެއްޗެއް ކަމަށެވެ. ރާއްޖެ ތަރައްގީ ކުރުމުގައި ވެސް އޭއައި މުހިއްމު ދައުރެއް އަދާކުރާނެ ކަމަށާއި އެސްޓޯނިއާގައި އެކަން ރޭވިފައި އޮތް ގޮތްތައް މި ދަތުރުފުޅުން އެނގިގެންދިޔަ ކަމަށެވެ.

އަޅުގަނޑުމެންގެ ގައުމަކީ ފުލީ ޑިޖިޓަލައިޒް ސާވިސްތަކެއް ލިބޭ، ހަމަ މުހިއްމު ހުރިހާ ޕަބްލިކް ސާވިސް ހިދުމަތްތަކެއް ޑިޖިޓަލައިޒްކޮށްދެވޭ ގައުމަކަށް ހެދުން އިރާދަކުރެވިއްޔާ ހާސިލުކުރެވިގެންދާނެ ދިވެހި ހުރިހާ ރައްޔިތުންގެ އެއްބާރުލުމާ އެކީގައި ކުރިއަށް އޮތް މި ދައުރުގެ ބާކީ އޮތް އަހަރުތަކުގެ ތެރޭގައި" ރައީސް ވިދާޅުވި އެވެ.