ކަރަންޓުގެ މައްސަލަ މުސީބާތަކަށް ވެއްޖެ: މޭޔަރު ނިޒާރު

ކަރަންޓާއި ފެނާ ނަރުދަމާގެ މައްސަލަ މުސީބާތަކަށް ހަދައިފި ކަމަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ. އައްޑޫ ސިޓީން ކަރަންޓް ކެނޑޭ މައްސަލަ ދިގުލައިގެން ގޮސްފައިވާ މައްސަލާގައި މޭޔަރު ނިޒާރުގެ އެކްސް އެކައުންޓުން ކޮސްފައިވާ ޕޯސްޓެއްގައި ވިދާޅުވެފައިވަނީ އެ މައްސަލަ ފެނަކަ ކުންފުންޏަށް ހައްލު ނުކުރެވޭނެ ކަމަށާއި އެއީ ސަލާމަތް ކުރަން ނޭނގި ބަގުރޫޓު ކުރެވިފައިވާ ކުންފުންޏެއް ކަމަށާއި، ކަރަންޓާއި ފެނާ ނަރުދަމާގެ މައްސަލަ މުސީބާތަކަށް ހަދައި ކަހާތަން ހިރުވާވެސް ނުލައި ތިބުމަކީ ވެވަޑައިގެންނެވި ވައުދު ހަނދާން ނެތޭނެ ކަމެއް ނޫންކަމަށާއި، އެކަން ހައްލުކޮށްދެވޭނީ ސީދާ ރައީސް ޑރ.މުއިއްޒުއަށް ކަމަށެވެ.

މިކަން ހައްލު ކޮށްދެވޭނީ ސީދާ ރައީސް މުއިއްޒަށް. އައްޑޫ ރައްޔިތުންނަށް ކަރަންޓާއި، ފެނާއި، ނަރުދަމާ މިއީ މުސީބަތަކަށް ހަދައި ކަހާތަން ހިރުވައި ނުލާ ތިބުމަކީ ވެވަޑައިގެންނެވި ވައުދު ހަނދާން ނެތޭނެ ކަމެއް ނޫން،" މޭޔަރ ނިޒާރު އެކްގައި ވިދާޅުވެފައިވެއެވެ.

އައްޑޫ ސިޓީން ކަރަންޓް ކެނޑޭ މައްސަލާގައި ފެނަކަ އިން ރޭ ނެރުނު ބަޔާނެއްގައި ބުނެފައިވަނީ ޖެންސެޓްތަކަށް ބޭނުންވާ ސްޕެއާ ޕާޓްސް ހޯދުމުގެ މަސައްކަތް ކުރަމުންދާ ކަމަށާއި އެގޮތުން ސްޕެއާ ޕާޓްސް ލިބި، އެއް ޖެންސެޓުގެ މައްސަލަ މިއަދު ހައްލުވާނެ ކަމަށެވެ. ސްޕެއާ ޕާޓްސް ލިބުނުހާ އަވަހަކަށް، ދެން ހުރި ޖެންސެޓުތައް ހައްލުކުރުމަށް މަސައްކަތް ކުރެވޭނެ ކަމަށާއި މި މައްސަލަ ހައްލުވަންދެން ކަރަންޓު ލޯޑް ހިފެހެއްޓުމަށްޓަކައި، ގުޅިފައިވާ ރަށްތަކުގެ އެކި ސަރަހައްދުތަކުން، އެކުލަވާލެވޭ ތާވަލާއި އެއްގޮތަށް، ކަރަންޓު ކެނޑުމަށް ހަމަޖެހިފައިވާ ކަމަށެވެ.