އެމްޑީޕީއަށް ނިސްބަތްވާ، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އޭނާއަށް ނޭނގި ވެރިކަން ކުރާ ޕީއެންސީއަށް ވެއްދި މައްސަލައިގައި، މެންބަރުކަމުގެ ގޮނޑި ނުގެއްލޭނެ ކަމަށް އިލެކްޝަންސް ކޮމިޝަންސް (އީސީ) އިން މިއަދު ބުނެފިއެވެ.
ފިއްޓޭ މިއަދު ވިދާޅުވީ، އޭނާ ޕީއެންސީއަށް ވެއްދިކަމަށް ފެންނަން އޮތް ތާރީޚަކީ މިދިޔަ މަހުގެ 23ވަނަ ދުވަސް ކަމަށެވެ.
އެ ކަން ކުރީ އޭނާއަށް އެއްވެސް މިންވަރަކަށް އެނގިގެން ނޫން ކަމަށާއި، އެ ކަން އެނގުނީ ވެސް އެހެން މީހެއްގެ ފަރާތުން މިއަދު ކަމަށް އޭނާ ވިދާޅުވިއެވެ.
މެންބަރަކު އޭނާ މަޖިލީހަށް އިންތިޚާބުވީ ޕާޓީ ބަަދަލުކުރުމަކީ އޭނާގެ ގޮނޑި ގެއްލޭނެ ކަމެއްގެ ގޮތުގައި ހަދައި އެންޓި ޑިފެކްޝަން ގާނުނެއް މި ސަރުކާރަށް ނިސްބަތްވާ މެންބަރުން ވަނީ ފާސްކޮށްފައެވެ.
އެއާއެކު ފިއްޓޭގެ ޕާޓީ ބަދަލުވުމާއެކު އޭނާގެ ގޮނޑިއަށް ވާނޭ ގޮތަކާމެދު އޮތީ ސުވާލު އުފެދިފައެވެ.
ފިއްޓޭ ޕީއެންސީއަށް ވެއްދި މައްސަލައިގައި އެމްޑީޕީން ވަނީ އެކަން ކުށްވެރިކޮށް ބަޔާނެއް ނެރެފައެވެ. އެމްޑީޕީން ގޮވާލާފައި ވަނީ އެކަން ސީރިއަސްކޮށް ތަހުގީގު ކޮށްދޭން ޖެހޭނެ ކަމަށެވެ.
