ޑިމޮކްރެޓްސް ރޫޅެނީ؛ ލަތީފު ޑިމޮކްރެޓްސްއިން އިސްތިއުފާ ދެއްވައިފި

ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސްގެ ރައީސްކަމުގެ މަގާމުން ހަސަން ލަތީފް (ހަސަންކޮ) ރޭ އިސްތިއުފާ ދެއްވައިފި އެވެ. އޭނާ އިސްތިއުފާ ދެއްވިއިރު، ޑިމޮކްރެޓްސްގެ ނައިބް ރައީސް މުހައްމަދު ޝިފާޒު ވަނީ އެ ޕާޓީގެ ނައިބްރައީސް ކަމުން އިސްތިއުފާދެއްވައި އަނބުރާ އެމްޑީޕީއާ ގުޅިވަޑައިގެންފަ އެވެ. އެމްޑީޕީއާ ގުޅޭނެތޯ ބައެއް މީޑިއާތަކުން ސުވާލުކުރުމުން ހަސަން އެއްޗެއް ވިދާޅެއް ނުވެ އެވެ. ނަމަވެސް މި ވަގުތު ހުންނެވީ އެއްވެސް ޕާޓިއެއްގައި ނޫން ކަމަށް އޭނާ ވިދާޅުވި އެވެ. އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ރަޝާދު އަދި މެދުހެންވޭރު ދާއިރާގެ ކުރީގެ މެމްބަރު އަލީ އާޒިމްގެ އިތުރުން  ގްރޭޓާ މާލެ އިންޑަސްޓްރިއަލް ޒޯން (ޖީއެމްއައިޒެޑްއެލް) ގެ ކުރީގެ އެމްޑީ އިބްރާހިމް ރަޝީދު (މާމިގިލި އިބޫ) ވެސް ވަނީ އެމްޑީޕީއަށް ސޮއިކޮށްފަ އެވެ.