މަޝްރޫޢުތަކަށް ބޭނުންވާ ބޮޑުހިލަ، ބަލްކުކޮށް ގެންނަން ނިންމާފައިވާކަމަށް ރައީސް ޑރ.މުއިއްޒު ވިދާޅުވެއްޖެ

ތަރައްގީގެ މަޝްރޫޢުތަކަށް ބޭނުންވާ ބޮޑުހިލަ ބަލްކުކޮށް ގެންނަން ނިންމާފައިވާކަމަށް ރައީސް ޑރ.މުއިއްޒު ވިދަޅުވެއްޖެއެވެ. ހުވަދޫ އަތޮޅުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ރަތަފަންދޫ އަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފޫލުގައި ރައީސް ޑރ.މުއިއްޒު ވިދާޅުވީ ހުއްޓިފައިހުރި ބިނާރުގެ މަސައްކަތްތައް އަލުން ފެށުމަށް ބޭނުންވާ ބޮޑުހިލަ ބަލްކުކޮށް ގެންނަން ނިންމަވާފައިވާކަމަށެވެ. އެގޮތުން މެޓީރިއަލް އަދި ފައިސާގެ ތާށިކަމާހެދި މަޑުޖެހިފައިހުރި މަޝްރޫޢުތައް އަލުން ފެށްޓެވުމަށް ކުރައްވަމުންގެންދަވާ މަސައްކަތްޕުޅުގެ މައްޗަށް އަލިއަޅުވާލައްވައި ދެއްކެވި ވާހަފުޅުގައި ދިވެހިރާއްޖޭގެ އެކިއެކި ރަށްތަކުގައި ހުއްޓިފައިހުރި މަޝްރޫޢުތަކަށް ބޭނުންވާ ތަކެތި ހޯއްދެވުމަށް، މިދިޔަ ހަފުތާ ތެރޭގައި އެކަމާ ގުޅިގެން ކުންފުނިތަކުގެ ވެރިންނާއި ފިނޭންސް މިނިސްޓަރާއި ކޮންސްޓްރަކްޝަން މިނިސްޓަރާއި ބައްދަލުކުރައްވައި، އެކަން ހަމަޖެއްސުމަށް ގޮތްތަކެއް ރޭވިފައިވާ ކަމަށާއި، އެގޮތުން ބޮޑުހިލަ ބަލްކުކޮށް ގެނައުމަށް ނިންމާފައިވާ ކަމުގައި ވިދާޅުވިއެވެ. އަދި މިކަން ކުރުމަށް ރާވާފައިވާ ގޮތާއި އެކަމަށް ބޭނުންވާ ފައިސާ ވެސް މިދިޔަ ހަފުތާގެ ތެރޭގައި ހަމަޖައްސައިދީފައިވާނެކަމަށްވެސް ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.