ރައީސް ޑރ. މުއިއްޒު މި ފަސް އަހަރު ހިންގަވާނީ ދެފުށް ފެންނަ ސަރުކާރެއް: މަޖިލިސް ރައީސް އަބްދުއްރަހީމް

ރައީސް ޑރ. މުއިއްޒު މި ފަސް އަހަރު ހިންގަވާނީ ދެފުށް ފެންނަ ސަރުކާރެއްކަމަށް ރައްޔިތުންގެެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ. ޕަބްލިކްސާވިސް މީޑިއާއަށް ދެއްވި ބަސްދީގަތުމެއްގައި މަޖިލިސް ރައީސް އަބްދުލްރަހީމް ވިދާޅުވީ ރައީސް ޑރ. މުހައްމަދު މުއިއްޒު މި ފަސް އަހަރު ހިންގަވާނީ ދެފުށް ފެންނަ ސަރުކާރެއް ކަމަށާއި ވާދަވެރިން ފާޑުކިޔަސް އެއީ ކަންބޮޑުވާންޖެހޭ ކަމެއް ނޫންކަމަށާއި، އެ ފާޑުކިޔުން ތަކަކީ ކުރާނެ ކަމެއް ނެތުމުން ވާދަވެރިން ކުރާކަމެއް ކަމަށެވެ.

ކުރާނެ ކަމެއް ނެތީއްޔާ ދެން ކޮންމެވެސް ކަމެއް ބަޔަކު ކުރާނެތާ. އެކުރާއިރު ގިނައިން ކުރެވޭނީ ބޭކާރު ކަންތައް، ވިޔާނުދާ ކަންތައް" އަބްދުލްރަހީމް ވިދާޅުވި އެވެ.

އެ ބަސްދީގަތުމުގައި މަޖިލިސް ރައީސް އަބްދުއްރަހީމް އިތުރަށް ވިދާޅުވީ ފަސް އަހަރުތެރޭ ހުރިހާ ކަމެއް މުޅިން ރަނުން ރަނަށް ނުކުރެވި ހިނގައިދާނެކަން ރައްޔިތުން ވެސް ގަބޫލުކުރާނެ ކަމަށާއި ނަމަވެސް ވައުދުތަކުގެ ބޮޑުބައި އެމަނިކުފާނު ހާސިލުކޮށްދެއްވާނެ ކަމަށާއި، މި ފަސް އަހަރު ވެގެންދާނީ ދިވެހިން ދެކެން ބޭނުންވާ ކަހަލަ އުފާފާގަތި، ތަރައްގީ އާއި ކުރިއެރުން ލިބިގެންދާނެ ފަސް އަހަރަށް ކަމަށްވެސް މަޖިލިސް ރައީސް އަބްދުލްރަހީމް ވިދާޅުވި އެވެ. ހަގީގަތެއްގެ މައްޗަށް ބިނާކުރުމެއް ނެތި ތިމާ ބޭނުންވާ ކަމެއް ހާސިލުކުރަން ވާހަކަދައްކާނަމަ ގިނަ ފަހަރަށް ގޮވޭނީ ކޮސް ކަމަށާއި އެ މަންޒަރު މިހާރު ގެތަކުގެ ސިޓިންރޫމްތަކުން ފެންނަމުންދާ ކަމަށްވެސް މަޖިލިސް ރައީސް އަބްދުލްރަހީމް އެ ބަސްދީގަތުމުގައި ވަނީ ވިދާޅުވެފަ އެވެ.