ނުވަ މީހުންގެ ޕާސްޕޯޓް ދޫކޮށްލައިފި

ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ދޫކުރި މައްސަލާގައި ރާއްޖެއިން ފުރުން މަނާކުރި 9 މީހެއްގެ ޕާސްޕޯޓް ދޫކޮށްލައިފި އެވެ. ފުލުހުން ތަހުގީގުކުރަމުންދާ ލިޔުންތަކެއް ފޯޖުކުރި މައްސަލައާ ގުޅިގެން މިދިޔަ ސަރުކާރުގެ ހައުސިން މިނިސްްޓްރީގެ އިސްވެރިން ހިމެނޭ ގޮތަށް 20 މީހަކުގެ ޕާސްޕޯޓް އޮތީ ހިފަހައްޓާފަ އެވެ. އެ މައްސަލައިގެ އަޕްޑޭޓް ހިއްސާކުރަމުން ފުލުހުން މިއަދު ބުނީ އޭގެ ތެރެއިން 9 މީހެއްގެ މައްޗަށް ނެރެފައިވާ އަމުރު ބާތިލުކޮށްފައިވަނީ ޕްރޮސެކިއުޓާ ޖެނެރަލް (ޕީޖީ) އާ މަޝްވަރާކޮށް, ޕީޖީގެ ލަފާގެ މަތިން ކަމަށެވެ. އެ މީހުންގެ ނަންތަކެއް ފުލުުހުން ހާމައެއް ނުކުރެ އެވެ. ފުލުހުން ބުނީ، އަމުރު ބާތިލްކުރި މީހުންގެ ތެރޭގައި އެޗްޑީސީގެ ކުރީގެ އެމްޑީ އިބްރާހިމް ފަޒުލް ރަޝީދު އާއި އޭނާގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ނުހިމެނޭ ކަމަށެވެ.