އެމްޑަބްލިއުއެސްސީގެ އީ-ޕޯޓަލް ތަޢާރަފްކޮށްފި

އެމްޑަބްލިއުއެސްސީގެ ޚިދުމަތްތައް އޮންލައިން ކުރުމަށްޓަކއި ޕޯޓަލެއް ތަޢާރަފުކޮށްފި އެވެ. މާލޭގެ ފެން ކުންފުނި މާލެ ވޯޓާ އެންޑް ސްވަރޭޖް ކޮމްޕެނީގެ އެކި ޚިދުމަތަށް އެދި ހުށައެޅުމަށާއި، ހޯދުމަށްއެދި ހުށަހަޅާފައިވާ ޙިދުމަތުގެ މަރުޙަލާތައް ފަސޭހަކަމާއެކު ބަލާލެވޭ ގޮތަށް ފަރުމާކޮށްފައިވާ "އެމްޑަބްލިއުއެސްސީ އީ-ޕޯޓަލް" އެކުންފުނިންވަނީ ބޭނުންކުރަންފަށާފައެވެ. ޕޯޓަލް އިފުތިތާހުކޮށް ދެއްވީ އެކަމަށްޓަކައި މިއަދު ބޭއްވި ރަސްމިއްޔާތުގައި އެމްޑަބްލިޔުއެސްސީގެ މެނޭޖިން ޑިރެކްޓަރު ޢަބްދުލް މަތީން މުޙައްމަދާއި ޗެއާޕާސަން ޝަމްހޫޒާ އަހުމަދެވެ. އެ ރަސްމިއްޔާތުގައި އެމްޑަބްލިޔުއެސްސީ ގެ މެނޭޖިންގ ޑިރެކްޓަރ މަތީން ވިދާޅުވީ މިއަދު ތަޢާރަފްކުރެވުނު ޕޯޓަލްގެ މަގްސަދަކީ ކުންފުނީގެ ޙިދުމަތްތައް ހޯދާ ފަރާތްތަކަށް ވީހާވެސް ފަސޭހައިން ކުންފުނީގެ ޚިދުމަތްތައް ހޯދޭނެ މަގުފަހިކޮށްދިނުން ކަމަށެވެ. އެމްޑަބްލިޔުއެސްސީން މިއަދު ތަޢާރަފްކޮށްފައިވާ ޕޯޓަލް އަކީ އީ-ފާސް މެދުވެރިކޮށް އޮންލައިން ކޮށް ކުންފުނީގެ ކަސްޓަމަރުންނަށް އެކިއެކި ޙިދުމަތްތަކަށް ހުށހެޅޭނެގޮތަށް ފަރުމާކޮށްފައިވާ އަދި ކަސްޓަމަރުންގެ އެކައުންޓް ތަކުގެ މައުލޫމާތު ފަސޭހައިން ބަލާލެވޭ ގޮތަށް އަދި އެއް ބިލަށްވުރެ ގިނަ ބިލްތަކަށް އެއްފަހަރާ ފައިސާ ދެއްކޭނެ ގޮތަށް ފަރުމާކޮށްފައިވާ ޕޯޓަލް އެކެވެ. މީގެ އިތުރުން ސްމާޓް މީޓަރު ހަރުކޮށްފައިވާ ގޭބިސީތަކުގެ ކަސްޓަމަރުންނަށް ވަކިވަކި މީޓަރުތަކުން ފެން ބޭނުން ކުރެވިފައިވާ މިންވަރުގެ ތަފުސީލާއި، ފެން މީޓަރުގެ ރީޑިންގެ އިތުރުން ފެން ބިލުތަކުގެ ތަފުސީލުތައް ވެސް ޕޯޓަލް މެދުވެރިކޮށް ބަލާލެވޭނެއެވެ.