މޫކޭ އާއި ޔާސިރު ދިރިރިއުޅޭ ތަންތަން ބަލައިފާސްކޮށް އިލެކްޓްރޯނިކް ސާމާނުތައް ހިފަހައްޓައިފި

ރޯޑް ޑިވެލޮޕްމެންޓު ކޯޕަރޭޝަން (އާރްޑީސީ)ގެ ކުރީގެ އެމްޑީ މޫސާ އަލިމަނިކް (މޫކޭ) އާއި އެ ކުންފުނީގެ ކުރީގެ ޗީފް ފައިނޭންސިނގ އޮފިސަރ ޔާސިރު ހަސަން ދިރިއުޅޭތަން ފުލުހުން ބަލައިފާސްކޮށް އެތަންތާގައި ހުރި އިލެކްޓްރޯނިކް ސާމާނުތައް ހިފަހައްޓައިފިއެވެ. ފުލުހުން ރޭ ވަނީ އާރްޑީސީގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ދިރިއުޅޭ ތަނާއި އެ ކުންފުނީގެ ކުރީގެ ޗީފް ފައިނޭންޝަލް އޮފިސަރު މަގާމުގައި ހުރި ޔާސިރު ހަސަން އަށް ނިސްބަތްވާ ދެ ތަނެއް ބަލައި ފާސްކޮށްފަ އެވެ. އެގޮތުން ފުލުހުންގެ ތަރުޖަމާން އަހްމަދު ޝިފާން ވިދާޅުވީ އެ ތަންތަން ބަލައި ފާސްކުރުމުގެ އިތުރަށް، އިލެކްޓްރޯނިކް ސާމާނުތައް ވެސް ހިފަހައްޓާފައިވާ ކަމަށެވެ. 2022 ސެޕްޓެންބަރު މަހު ފެންމަތިވި ހިޔާނާތުގެ މައްސަލަތަކުގައި އެ ކުންފުނީގެ ގިނަ މުވައްޒިފުންތަކެއް ބައިވެރިވެފައިވާ ކަމަށް ފާހަގަކޮށްފައިވާއިރު އެ ކުންފުނީގެ ތިން މީހެއްގެ އެކައުންޓަށް އެކި ފަހަރުމަތިން 14 މިލިއަނެއްހާ ރުފިޔާ ޖަމާކޮށްފައިވާ ކަމަށާއި އެކެއްގެ އެކައުންޓަށް 216 ޓްރާންސެކްޝަން ހަދާފައިވާ ކަމަށް ފުލުހުން މީގެ ކުރިން ވަނީ ބުނެފައެވެ.