މިއަހަރު ރާއްޖެ ޒިޔާރަތްކުރި ފަތުރުވެރިންގެ އަދަދު ދެ މިލއަނުން މައްޗަށް

މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދެ މިލިއަނުން މައްޗަށް އަރައިފިއެވެ. މިއަހަރު ރާއްޖެއަށް ޒިޔާރައްކުރި 2 މިލިއަން ވަނަ ފަތުރުވެރިޔާއަށް މަރުޚަބާ ކިޔާފައިވަނީ ރާއްޖޭގެ ޓޫރިޒަމް މިނިސްޓަރ އިބްރާހިމް ފައިސަލް އެވެ. އެކަމަށްޓަކައި މިއަދު ހެނދުނު ވެލާނާ އިންޓަނޭޝަނަލް އެއާޕޯޓްް (ވީއައިއޭ) ގައި ހާއްސަ ރަސްމިއްޔާތެއް ބާއްވާފައެވެ. ރާއްޖެއަށް 1 އަހަރުތެރޭ 2 މިލިއަން ފަތުރުވެރިން ޒިޔާރަތްކުރުން ފާހަގަކުރުމަށް ބޭއްވި ރަސްމިއްޔާތުގައި ވެލާނާ އިންޓަރނޭޝަނަލް އެއާޕޯޓްގެ އިސްވެރިންނާއި އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީ އާއި، އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުޙައްމަދާއި އިމިގްރޭޝަންގެ އިސްވެރިން ބައިވެރިވެވަޑައިގެންފައިވެއެވެ. ރާއްޖެއަށް 2 މިލިއަން ވަނައަށް ޒިޔާރަތްކުރި ފަތުރުވިޔާ އަކީ އޮސްޓްރޭލިއާ ގެ އަންހެންނެކެވެ. އެ މީހާއަށް ޓޫރިޒަމް މިނިސްޓަރ އިބްރާހިމް ފައިސަލް ވަނީ ހާއްސަ ހަދިޔާއެއްވެސް ދެއްވާފައެވެ. ރާއްޖެއަށް މިއަހަރު އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. އެގޮތުން ޗައިނާ އިން މިހާތަނަށް 261821 ފަތުރުވެރިން ޒިޔާރަތްކޮށްފައިވާއިރު، ރަޝިއާ އިން މިހާތަނަށް 217724 ފަތުރުވެރިން، އިނގިރޭސިވިލާތް 176312 ފަތުރުވެރިން،  ޖަރުމަނުވިލާތުން 153319 ފަތުރުވެރިން އަދި އިޓަލީ ވިލާތުން 136916 ފަތުރުވެރިން ޒިޔާރަތްކޮށްފައިވެއެވެ. ރާއްޖެ އަށް މިދިޔަ އަހަރު ޒިޔާރަތްކޮށްފައިވަނީ 1.8 މިލިއަން ޓޫރިސްޓުންނެވެ.