ފަޒުލް ދިރިއުޅޭ ގެ ބަލާ ފާސްކޮށް ބައެއް ތަކެތި ފުލުހުން ގެންގޮސްފި

ބިންވެރިޔާ އަދި ގެދޮރުވެރިޔާ ސްކީމާ ގުޅޭގޮތުން ފުލުހުން ތަހުގީގުކުރަމުންދާ މައްސަލައާ ގުޅިގެން ހައުސިން ޑިވެލޮޕްމެންޓް (އެޗްޑީސީ) ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅޭ ގެ ބަލައި ފާސްކޮށްފައިވާ ކަމަށް ފުލުހުން މިއަދު ބުނެފި އެވެ. ފުލުހުން ބުނީ، ފަޒުލް ދިރިއުޅޭ ގެ ރޭ ބަލައި ފާސްކޮށްފައި ވަނީ ކޯޓު އަމުރެއްގެ ދަށުން ކަމަށެވެ. ބަލައި ފާސްކޮށް ތަހުގީގަށް ބޭނުންވާ ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވާއިރު އޭގެ ތެރޭގައި އިލެކްޓްރޯނިކް ސާމާނުތައްވެސް ހިމެނޭ ކަމަށް ފުލުހުން ބުންޏެވެ. "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ގޯތި ދިން މައްސަލައެއްް ފެންމަތިވެ ސަސްޕެންޑްކޮށްފައި ވަނިކޮށް އެޗްޑީސީގެ އެމްޑީގެ މަގާމުން ފަޒުލް އިސްތިއުފާ ދެއްވީ ހޮނިހިރު ދުވަހު އެވެ. ޝަރުުތު ހަމަނުވާ ބަޔަކަށް ގޯތިތަކެއް ދިން ކަމަށް ބުނާ ވާހަކަތައް ދޮގުކޮށް އިސްތިއުފާގެ ސިޓީގައި ފަޒުލް ވިދާޅުވީ، މަގާމަށް އައްޔަންކުރުމަށްފަހު ކުންފުނީގެ ފަރާތުން މިހާތަނަށް ކޮށްފައިވާ ހުރިހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ކުންފުނީގައި ހެދިފައިވާ ޕޮލިސީތަކުގެ އިމުގެ ތެރެއިން ކުންފުނީގެ މަސްލަހަތު އިސްކޮށްގެން ކޮށްފައިވާ މުއާމަލާތްތަކެއް ކަމަށެވެ. ބިންވެރިޔާގެ ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫން ކަމަށް ފަޒުލް ވިދާޅުވި އެވެ. އަދި އެ ތުހުމަތުތަކުގެ ހަގީގަތް ވީ އެންމެ އަވަސް ފުރުސަތެއްގައި ރައްޔިތުންނަށް ހާމަކޮށްދިނުމަށް އޭނާ އެދިވަޑައިގެންނެވި އެވެ.