މުޒާހަރާއާ ގުޅިގެން ހައްޔަރުކުރި ދެ ޓެކްސީ ޑްރައިވަރުން ދޫކޮށްލައިފި

މިދިޔަ ހަފްތާގެ ބުދަ ދުވަހު ޓެކްސީ ޑްރައިވަރުން ކުރިއަށް ގެންދިޔަ އިހުތިޖާޖު ގައި އާއްމު ދަތުރުފަތުރަށް ހުރަސް އަޅައި މަގު ބްލޮކް ކުރި ކަަމުގެ ތުހުމަތުގައި ހައްޔަރުކޮށް ބަންދަށް 5 ދުވަސް ޖެހި ދެ ޑްރައިވަރުން މިއަދު ދޫކޮށްލައިފި އެވެ. ހުޅުމާލެ މެޖިސްޓްރޭޓް ކޯޓުން ދޫކޮށްލައިފައިވަނީ މއ. ވިރާހު، މުހައްމަދު ޝާމިން (36އ) އާއި އަހަރުގެ ލ. ދަނބިދޫ ސަންރޭ، އަހުމަދު ޝަބީން (33އ) އެވެ. އެ ދެ ޑްރައިވަރުން ދޫކޮށްލީ، ބަންދުގެ މައްސަލަ އިސްތިއުނާފް ކުރުމަށް ހައި ކޯޓަށް ހުށަހަޅާފައި ވަނިކޮށެވެ. އިހުތިޖާޖާ ގުޅިގެން އެ ދެ ޑްރައިވަރުންގެ އިތުރުން ހދ. ކުމުންދޫ، ހޮލިޑޭވިލެޖް، ނުއޫމާން އަހުމަދު (36އ) އާއި މާލެ ސިޓީ, މއ ނަހީދީމަންޒިލް, މިސްބާހު ޝަރީފް (31އ) ހައްޔަރު ކުރި އެވެ. އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝާމިންއާއި ޝަބީން އަދި މިސްބާހު 5 ދުވަހަށް ބަންދުކުރަން އަމުރުކޮށްފައިވާއިރު ޝަރުތުތަކާއެކު ނުއުމާން ދޫކޮށްލާފައިވެ އެވެ.