ތިން މިނިސްޓްރީއެއް އަނދައި ހުލިވި މައްސަލާގައި ދައުރުން ބޭރުން ޖަލްސާއެއް ބާއްވައިދޭން އެމްޑީޕީން އެދެނީ

މި މަހުގެ 12 ވަނަ ދުވަހު ހިނގި އަލިފާނުގެ ހާދިސާއާއި ގުޅިގެން 3 މިނިސްޓްރީއެއް އަނދައި ހުލިވި މައްސަލާގައި ދައުރުން ބޭރުން ރައްޔިތުންގެ މަޖިލީހުގެ ޖަލްސާއެއް ބާއްވައި ދިނުމަށް އެދޭނެ ކަމަށް މޯލްޑިވިއަން ޑިމޮކްރަޓިކް ޕާޓީ އިން ބުނެފި އެވެ. އަލިފާނުގެ ހާދިސާއާއި ގުޅިގެން އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީގެ ޕީޖީ ގްރޫޕްގެ ލީޓަރ ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރ އިބްރާހިމް ނާޒިލް ވިދާޅުވީ އަލިފާނުގެ ހާދިސާގައި ގެއްލިގެން ދިޔައީ ރައްޔިތުންގެ މުދަލާއި އަގުނު ނުކުރެވޭނެ ފަދަ ދައުލަތާއި ރައްޔިތުންނާއި ގުޅުންހުރި މުހިއްމު ލިޔެކިޔުންތަކާއި މައުލޫމާތު ތަކެއް ކަމަށާއި، އަލިފާނުގެ ހާދިސާގައި ކަމާ ގުޅުންހުރި މުވައްސަސާ ތަކުން އަމަލުކޮށްފައިވާގޮތުގައި އިހްމާލުތަކެއް ހުރިކަން ފާހަގަކުރެވިފައިވާތީ އެކަމާ ގުޅިގެން ރައްޔިތުންގެ މަޖިލީހުގެ ކުއްލި ޖަލްސާއެއް ދައުރުންބޭރުން ބާއްވައިދިނުމަށް އެދިލައްވާނެ ކަމަށެވެ. ނާޒިލް ވިދާޅުވީ ދައުރުން ބޭރުން ޖަލްސާއެއް ބާއްވައިދިނުމަށް އެދި ހުށަހެޅޭ އަދަދަށް އެމްޑީޕީގައި މަޖިލިސް މެންބަރުންގެ އަދަދު ހަމަނުވާކަމަށާއި އެހެންކަމުން ރައްޔތުންގެ މަޖިލީހުގެ ރައީސް ގެ އަރިހުން އެކަން ކޮށްދިނުމަށް އެމްޑީޕީން އެދެން ނިންމާފައިވާކަމަށެވެ. އެގޮތުން އެކަމަށްއެދި މަޖިލީހުގެ ރައީސް އަބްދުއްރަހީމް އަބްދުﷲއަށް އެމްޑީޕީ ޕާލިމެންޓްރީ ގްރޫޕުން ސިޓީއެއް ފޮނުވާނެ ކަމަށްވެސް ވިދާޅުވި އެވެ. ރައްޔިތުންގެ މަޖިލީހުގެ ގަވައިދުގައި ބުނެފައިވަނީ ދައުރުން ބޭރުގައި ޖަލްސާއެއް ބާއްވަން މަޖިލީހުގެ ތިންބައިކުޅަ އެއްބައި މެންބަރުން ސަބަބު ބަޔާންކޮށް މަޖިލީހުގެ ރައީސަށް ހުށަހަޅައިފިނަމަ  14 ދުވަހުގެ ތެރޭގައި އެ ޖަލްސާއެއް ބާއްވަންވާނެ ކަމަށެވެ.