އިއްޔެ ރައްޔިތުންގެ މަޖިލީހުގެ ޖަލްސާގައި، މިނިސްޓަރ ޒަމީރު ވިދާޅުވީ ސަރުކާރު ހިއްސާވާ ކުންފުނިތަކުން އެ ކުންފުނީގެ މައިގަނޑު މަސައްކަތް ކުރުން މުހިންމުކަމަށެވެ. އެގޮތުން، ހައްޖު ކޯޕަރޭޝަނުން ޓޫރިޒަމް ވިޔަފާރިއަށް ވަނުން ވެސް ރަނގަޅު ނުވާނެ ކަމަށް މިނިސްޓަރު ވިދާޅުވިއެވެ.
ހައްޖު ކޯޕަރޭޝަނުން ވަނީ ކ. މާފުށީގައި ސިޓީ ހޮޓަލެއް އިމާރާތްކޮށް "ހަލާލް ޓޫރިޒަމް" އަށް އިންވެސްޓް ކުރުމަށް ނިންމާފައިވާ ކަމަށް އިއުލާނުކޮށްފައެވެ.
މިނިސްޓަރ ޒަމީރު ވިދާޅުވީ ކުންފުނީގެ ފަންޑާއި، ވަސީލަތްތައް އިތުރު އާމްދަނީއެއް ހޯދުމަށް ބޭނުންކުރާނަމަ، ފަންނީ މާހިރުންގެ ލަފަޔާއި އިރުޝާދާއެކު އެކަން ކުރުން ރަނގަޅުކަމަށެވެ. އަދި ކުންފުނީގެ ހިއްސާދާރުންނަށް އަދި ބޯޑަށް ، ގެސްޓް ހައުސް ހިންގުން އެންމެ ފައިދާ ހުރި މަސައްކަތްތޯ އަލުން ވިސްނާލުމަށް އޭނާ ވަނީ ލަފާ ދެއްވާފައެވެ.
މިނިސްޓަރ އިތުރަށް ވިދާޅުވީ، އެޗްޑީސީ، ހައްޖު ކޯޕަރޭޝަން، ފެނަކަ ފަދަ ސަރުކާރުގެ ކުންފުނިތަކުން ޓޫރިޒަމް ދާއިރާއަށް ވަނުމުން އެކަމުގެ ނަތީޖާ އެންމެ ރަނގަޅު ނުވާނެކަމަށެވެ.
