ޖީންސާއި ޓީޝާޓް ފަދަ ތަކެތި ލައިގެން އިމާމުވެ ނަމާދުކުރުން މަނާކޮށްފި

އިމާމުންނާއި މުދިމުންގެ ސުލޫކީ މިންގަނޑު ބަހައްޓަންވީ ގޮތުގެ އުސޫލު ކަނޑައަޅާ، އާއްމުކޮށްފި އެވެ. ބުރާސްފަތި ދުވަހު ސަރުކާރުގެ ގެޒެޓްގައި އިސްލާމިކް މިނިސްޓްރީން އާއްމުކޮށްފައިވާ އެ އުސޫލުގައި ވަނީ ހެދުން އަޅާނެ ވަކި މިންގަނޑުތަކެއް ކަނޑައަޅާފަ އެވެ. އެގޮތުން އިމާމުވެ ނަމާދު ކުރާއިރު ޖީންސާއި ޓީޝާޓް ފަދަ ތަކެތި ލައިގެން ނަމާދު ނުކުރުމަށް އެ އުސޫލުގައި އަންގާފައިވެ އެވެ. އެ އުސޫލުގައި ބުނީ، އިމާމުވެ ނަމާދުކުރާ އިރު ލައިގެން ހުންނަންވާނީ، އިސްލާމީ މުޖުތަމައު ބަލައިގަންނަ ފަދަ ހެދުމެއްގައި ކަމަށާއި، އެއީ ގަޔަށް ބާރު ހެދުމަކަށްވެގެން ނުވާނެ ކަމަށެވެ. އުސޫލު ކަނޑައަޅާފައިވާއިރު، އިމާމުންގެ ރިވެތި އަހުލާގާއި ސާފުތާހިރުކަން ދެމެހެއްޓުމަށް ބާރު އަޅާފައިވެ އެވެ. އެގޮތުން، އަމިއްލައަށް ކުރާ އެއްވެސް ކަމަކުން ނުވަތަ ހިންގާ ހަރަކާތަކުން އިމާމުންގެ ގަދަރާއި ހައިބަތަށް އިތުބާރު ގެއްލޭ ފަދަ އަމަލުތަކުން ދުރުހެލިވުމަށް އެ އުސޫލުގައި އަންގާފައިވެ އެވެ. އަދި މިސްކިތުގެ ޖަމާއަތުގައި މައުމޫމުންނަށް ނަމޫނާއަކަށް ވާނެ ފަދަ ގޮތަކަށް ސާފުތާހިރު ވެގެން ހުރުމަށް އުސޫލުގައި ބަޔާން ކޮށްފައިވެ އެވެ. އަދި އިސްލާމީ އުންމަތް ބަލައިގެންފައިވާ ދީނީ އިލްމުވެރިންނަށް އިހްތިރާމް ކުރުމަށާއި، އަޅުކަމުގައި ދީނީ ގޮތުން ބައިބައިވުން އުފެދިދާނެ ފަދަ އަމަލުތަކުން ދުރުހެލި ވުމަށް ވެސް އުސޫލުގައި ހިމަނާފައިވެ އެވެ. އުސޫލު ކަނޑައެޅިފައިވާއިރު، ސުންނަތް ޖަމާއަތަށް ފުށުއަރާ ގޮތަށް މިސްކިތުގައި ވަކިން ޖަމާއަތް ހަދައިގެން ނަމާދުކުރުން ފަދަ ކަންކަން ކުރާ ފަރާތްތަކުގެ މައުލޫމާތު މިނިސްޓްރީއަށް އެންގުމުގެ ޒިންމާ ވެސް ވަނީ އިމާމުންނާއި މުދިމުންނަށް މަތިކޮށްފަ އެވެ.