އަނެއްކާވެސް ހުޅުމާލެއިން އިތުރު ބިންތަކެއް ވިއްކަން ހުޅުވާލައިފި

ދިވެހިންނަށް ގަނެވޭ ގޮތަށް އަނެއްކާވެސް ހުޅުމާލޭގެ ދެވަނަ ފިޔަވަހިން އިތުރު 8 ބިން ވިއްކަން ހުޅުވާލައިފި އެވެ. ބީލަމުގެ އުސޫލުން މިފަހަރު ވިއްކަން ހުޅުވާލާފައިވަނީ ބީޗް ފްރަންޓުން ދޫކުރާ 2 ބިމަކާއި ބީޗް ސައިޑުން ދޫކުރާ 6 ބިމެކެވެ. ބީޗް ފްރަންޓުން ވިއްކުމަށް ހުޅުވާލާފައި ވަނީ 1708 އަކަފޫޓޫގެ ބިމަކާއި 1737 އަކަފޫޓޫގެ ބިމެކެވެ. އަދި ބީޗް ސައިޑުން ވިއަކަން ހުޅުވާލާފައިވަނީ 1513 އަކަފޫޓާއި 1534 އަކަފޫޓާ ދެމެދުގެ ބިންތަކެއް ކަމަށް އެޗްޑީސީން ވަނީ ބުނެފައެވެ. ބީޗް ފްރަންޓް ބިންތަކުގެ ބީލަން ފެށޭ އަގަކީ 4،500ރ. އެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4،000ރ. އެވެ. މީގެ ކުރިން ބިންވަިއްކަން ހުޅުވާލި ދެ ފަހަރާއި އެއްގޮތަށް މިފަހަރުވެސް ބިންގަތުމަށް ހުށަހެޅޭނީ އުމުރުން 18 އަހަރުވެފައިވާ ދިވެހިންނަށާއި، ބީލަން ހުށަހަޅަނީ ކުންފުންޏަކުން ނަމަ، އެ ކުންފުންޏަކީ ރާއްޖޭގައި ރަޖިސްޓްރީކޮށްފައިވާ 100 ޕަސެންޓް ދިވެހިންގެ ހިއްސާ އޮންނަ ކުންފުންޏަކަށް ވާނަމައެވެ. މީގެ ކުރިން އެޗްޑީސީން ވަނީ ހުޅުމާލެ ފޭސް 2 އިން 16 ބިމަކާއި 18 ބިމެއް ވިއްކަން ދެ ފަހަރެއްގެ މަތިން ހުޅުވާލާފައެވެ.