ނިކަމެތިންނަށް ފައިދާއެއްވާން ނޭދޭ ވެރިން ކުރިޔަތް އޮތް ތަނުގައި ރައްޔިތުންނަށް ސާފުކޮށް ފެންނާނެ: ރައީސް ޑރ.މުއިއްޒު

ނިކަމެތިންނަށް ފައިދާއެއްވާން ނޭދޭ ސިޔާސީ ވެރިން ކުރިޔަތް އޮތް ތަނުގައި ރައްޔިތުންނަށް ސާފުކޮށް ފެނިގެންދާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ. ރައީސް ޑރ. މުއިއްޒު އެމަނިކުފާނުގެ އެކްސް އެކައުންޓުގައި މިއަދު ކުރައްވާފައިވާ ޕޯސްޓެއްގައި ވިދާޅުވެފައިވަނީ ނިކަމެތިންނަށް ފައިދާވާން ބޭނުންނުވާ ސިޔާސީވެރިން ކުރިއަށް އޮތްތަނުގައި ސާފުވާނެ ކަމަށާއި އެމަނިކުފާނުގެ ސަރުކާރު ކުރިއަށްދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމުގައި ކަމަށެވެ.

ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފު ވާތަން ކުރިޔަށް އޮތް ތާނގައި އިތުރަށް ފެންނާނެ! މި ސަރުކާރު ކުރިޔަށްދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމުގައި!

ރައީސް ޑރ.މުއިއްޒު އެ ގޮތަށް ޓްވީޓްކުރައްވާފައިވަނީ ސަރުކާރުން ވަރަށް ގިނަ ގާނޫނު ތަކަކަށް ބޮޑެތި ބަދަލުތަކެއް ގެނައުމަށް ކުރާ މަސައްކަތައް ވަރަށްގިނަ ސިޔާސީ ފަރާތްތަކުންނާއި ރާއްޖޭގެ ނުފޫޒުގަދަ ބައެއް ފަރާތްތަކުގެ ފާޑުކިޔުން ވަރަށް ބޮޑަށް އަމާޒުފެވައިވަނިކޮށެވެއެ. އެގޮތުން ގާނޫނު ތަކަށް ގެންނަން މަސައްކަތްކުރާ ބައެއް އިސްލާހުތަކާ ގުޅިގެން އިދިކޮޅު އެމްޑީޕީން ކަންބޮޑުވުން ފާޅުކޮށްފައިވާއިރު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް އެކުލަވާލައި ގެޒެޓުކޮށްފައިވާ ބޭރު ފައިސާ އާއި ބެހޭ ގަވާއިދު ގެ ދަށުން ޑޮލަރު މާރު ކުރަން މަޖުބޫރު ކޮށްފައި އޮތްއޮތުން ހުއްޓުވައިދިނުމަށް ރާއްޖޭގެ ޓޫރިޒަމް ދާއިރާގެ ބޮޑެތި ކުންފުނިންތަކުން ވަނީ ސަރުކަރުގައި އެދިފައެވެ.