މީރާގެ ޑެޕިއުޓީއަކަށް އަމީޒާ

މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް އެ އޮތޯރިޓީގެ އެސިސްޓެންޓް ކޮމިޝަނަރު ޖެނެރަލް އެންފޯސްމެންޓް ފާތިމަތު އަމީޒާ އައްޔަންކުރަން ރައްޔިތުންގެ މަޖިލީހުން ފާސްކޮށްފި އެވެ. އެ މަގާމަށް އަޒީމާ އައްޔަންކުރަން މަޖިލީހުން ފާސްކޮށްފައިވަނީ މިއަދުގެ ޖަލްސާގައި ވޯޓުގައި ބައިވެރިވެވަޑައިގެން 64 މެންބަރުންގެ އިއްތިފާގުންނެވެ. މިދިޔަ މަހުގެ 23 ވަނަ ދުވަހު ރައީސް ޑރ. މުހައްމަދު މުއިއްޒު ވަނީ އެ މަގާމަށް ޝަރުތު ހަމަވާ ދެ ބޭފުޅުންގެ ނަން މަޖިލީހަށް ފޮނުވާފަ އެވެ. އެއީ އަމީޒާގެ އިތުރުން މިހާރުވެސް އެ މަގާމުގައި ހުންނެވި އަސްމާ ޝަފީއުގެ ނަމެވެ. އެ މައްސަލަ އިގްތިސޯދީ ކޮމިޓީން ދިރާސްކޮށްފައިވާއިރު އެ ކޮމިޓީގެ މުގައްރިރު, ފުވައްމުލަކު މެދު ދާއިރާގެ މެންބަރު އަލީ ފަޒާދު ވަނީ ކޮމިޓީ ރިޕޯޓު މަޖިލީހަށް ހުށަހަޅުއްވައިދެއްވާފަ އެވެ.