ސީ-ޓު-އެއާ ކާގޯ ޚިދުމަތް އިންޑިއާއިން ވެސް ހިފަން ފަަށައިފި؛ ރާއްޖެ މެދުވެރިކޮށް ފުރަތަމަ ޝިޕްމަންޓް ޔޫރަޕަށް

ސީ-ޓު-އެއަރ ކާގޯ ޚިދުމަތް މެދުވެރިކޮށް އިންޑިއާއިން ރާއްޖެއަށް ގެނައި މުދާތަކެއް ޔޫރަޕަށް ފޮނުވައިފިއެވެ. ސީ-ޓު-އެއަރ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މިމަސައްކަތަކީ، ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ، އަދި މިމަސައްކަތުން އެގައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ. ސީ-ޓު-އެއަރ ކާގޯ ޚިދުމަތް މެދުވެރިކޮށް މިހާތަނަށް ރާއްޖޭން ބޭރުކޮށްފައިވަނީ، ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ. މި ޚިދުމަތަށް އޮންނަ ޑިމާންޑު އިތުރުވަމުންދާއިރު، މިހާރު މިވަނީ އިންޑިއާއިން ގެނައި މުދާތަކެއް ޔޫރަޕަށް ފޮނުވާލާފައެވެ. މޯލްޑިވްސް އެއަރޕޯޓްސް ކޮމްޕެނީ ލިމިޑެޓް، އެމް.އޭ.ސީ.އެލުން ވިދާޅުވީ، އިންޑިއާއިން ރާއްޖެއަށް ގެނައި މުދާތަކެއް ޖަރުމަންވިލާތަށް ފޮނުވާފައިވާކަމަށެވެ. މި މުދާތައް ފޮނުވާފައިވަނީ ކޮންޑޯ އެއަރލައިން މެދުވެރިކޮށެވެ. ރާއްޖޭގައި މި ޚިދުމަތްދެމުންދަނީ މޯލްޑިވްސް އެއަރޕޯޓްސް ކޮމްޕެނީ ލިމިޑެޓު، އެމްއޭސީއެލުން، މޯލްޑިވްސް ޕޯޓްސް ލިމިޑެޓު، އެމްޕީއެލް އާއި މޯލްޑިވްސް ކަސްޓަމްސް ސަރވިސް ގުޅިގެންނެވެ. ސީ-ޓު-އެއަރ ކާގޯ ޚިދުމަތް ރާއްޖޭގައި ފަށާފައިވަނީ މިއަހަރުގެ މެއިމަހުއެވެ. މިމަސައްކަތުގައި މިވަގުތު ރާއްޖެއަށް ދަތުރުކުރާ 7 އެއަރ ލައިނަކުން ވަނީ ބައިވެރިވެފައެވެ. މި ޚިދުމަތަށް އޮތް ޑިމާންޑު އިތުރުވަމުންދާއިރު، ނިމިދިޔަ އޮކްޓޫބަރ މަހު އެކަނިވެސް، 96 ކޮންޓެއިނަރ (418 ޓަނުގެ މުދާ / 34946 ދާގީނާ) ގެ މުދާ ވައިގެ މަގުން ރާއްޖޭން ބޭރަށް ފޮނުވާފައިވާކަމަށް އެމްޕީއެލުން މައުލޫމާތުދެއެވެ.