ފަހު ކުއާޓާގެ ދިރާގުގެ އާމްދަނީ 691 މިލިއަނަށް

މި އަހަރުގެ ތިންވަނަ ކުއާޓަރުގައި ދިރާގަށް އާމްދަނީގެ ގޮތުގައި 691.1 މިލިއަން ރުފިޔާ ލިބިއްޖެ އެވެ. މިއީ މި އަހަރުގެ ދެވަނަ ކުއާޓަރުގައި ދިރާގަށް ލިބުނު އާމްދަނީއަށްވުރެ އިތުރުވުމެކެވެ. ދެވަނަ ކުއާޓަރުގައި ދިރާގަށް އާމްދަނީގެ ގޮތުގައި ލިބުނީ 687.2 މިލިއަން ރުފިޔާ އެވެ. އެންމެ ބޮޑު އާމްދަނީއެއް ދިރާގަށް މި އަހަރުގެ ތިންވަނަ ކުއާޓަރުގައި ލިބުނީ މޯބައިލް ހިދުމަތްތަކުންނެވެ. އެގޮތުން، މޯބައިލް ހިދުމަތްތަކުން 363.3 މިލިއަން ރުފިޔާގެ އާމްދަނީއެއް ލިބުނުއިރު ފިކްސްޑް، ބްރޯޑްބޭންޑް އަދި އެންޓަޕްރައިސް ހިދުމަތްތަކުން 306.7 މިލިއަން ރުފިޔާގެ އާމްދަނީއެއް ލިބިފައިވެ އެވެ. މީގެ އިތުރުން، އެހެނިހެން ހިދުމަތްތަކުން މި އަހަރުގެ ތިންވަނަ ކުއާޓަރުގައި 21 މިލިއަން ރުފިޔާގެ އާމްދަނީއަށް ވަނީ ލިބިފަ އެވެ. އަދި ޓެކުހަށް ކެނޑުމުގެ ކުރިން މި އަހަރުގެ ތިންވަނަ ކުއާޓަރުގެ ފައިދާއަކީ 282 މިލިއަން ރުފިޔާ އެވެ. އަދި ޓެކުހަށް ކެނޑުމަށްފަހު މި އަހަރުގެ ތިންވަނަ ކުއާޓަރުގައި ދިރާގަށް ފައިދާގެ ގޮތުގައި 241.2 މިލިއަން ރުފިޔާ ލިބިފައިވެ އެވެ.