ގުޅީފަޅުން ގޯތި ލިބިފައިވާ ފަރާތްތަކުގެ ގުރުއަތު ނެގުމާ ގުޅިގެން ޝަކުވާ ހުށަހަޅުމުގެ ފުރުސަތު

ބިންވެރިޔާ ސްކީމްގެ ދަށުން ގުޅީފަޅުން ގޯތި ލިބިފައިވާ ފަރާތްތަކުގެ ގުރުއަތު ނެގުމާ ގުޅިގެން އެއްވެސް ޝަކުވާއެއް ވާނަމަ އެކަން ހުށަހަޅުމުގެ ފުރުސަތު ހުޅުވާލައިފި އެވެ. ސަރުކާރު ގެޒެޓުގައި ހައުސިން މިނިސްޓްރީން ޝާއިއުކުރި އިއުލާނެއްގައި ބުނީ ގޯތި ލިބުނު ފަރާތްތަކުގެ ފޯމު ނަންބަރާއި، ލޮޓް ނަންބަރު އަދި އެ ގޯތިތަކުގެ ބޮޑުމިނުގެ ތަފްސީލް ހިމެނޭ ލިސްޓު އިއުލާނާ އެކުގައި އާންމުކުރެވިފައިވާ ކަމަށެވެ. އެހެންކަމުން ގޯތި ލިބިފައިވާ ފަރާތްތަކުން އެއްވެސް ޝަކުވާއެއް އޮތް ނަމަ https://hiyaavehi.housing.gov.mv ޕޯޓަލް މެދުވެރިކޮށް މި އަންނަ މަހުގެ 7 ވާ ބުރާސްފަތި ދުވަހުގެ 14:00 ގެ ކުރިން ޝަކުވާ ހުށަހެޅުމަށް އެ އިއުލާނުގައިވެ އެވެ. ގުޅީފަޅުން ގޯތި ލިބިފައިވާ ފަރާތްތަކުގެ ގުރުއަތު ނެގުން އޮތީ މިިދިޔަ އަންގާރަ ދުވަހު ދަރުބާރުގެ ރަންނަބަނޑޭރި މާލަމުގަ އެވެ. އެއީ މިދިޔަ ސަރުކާރުގައި ގިރާވަރުފަޅުން ދޫކުރި ގޯތި ލިބުނު މީހުންގެ ތެރެއިން ގުޅީފަޅަށް ގޯތި ބަދަލުކުރި މީހުންނާއި ގުޅީފަޅުން ގޯތި ލިބުނު މީހުންނަށް އޮތް ގުރުއަތުލުމެއް ކަމަށް މިނިސްޓްރީން ވަނީ ބުނެފަ އެވެ. އަދި އެ ބަދަލަކީ "ގުޅީފަޅުގެ ލޭންޑް ޔޫސް ޕްލޭން"ގެ ދަށުން އައިސްފައިވާ ބަދަލެއް ކަމަށްވެސް މިނިސްޓްރީން ވަނީ ބުނެފަ އެވެ. އެ ގުރުއަތުލުމަކީ މިދިޔަ ސަރުކާރުގައި ގިރާވަރުފަޅުން ދޫކުރި ގޯތި ލިބުނު މީހުންގެ ތެރެއިން ގުޅީފަޅަށް ގޯތި ބަދަލުކުރި މީހުންނާއި ގުޅީފަޅުން ގޯތި ލިބުނު މީހުންނަށް އޮތް ގުރުއަތުލުމެއް ކަމަށްވެސް މިނިސްޓްރީން ބުނެ އެވެ.