އަލުން މައްސަލަ ހުށަހަޅަން ދިން މުއްދަތު ހަމަވިފަހުން ހުށަހެޅުމުން ޖިހާދުގެ މައްސަލަ ހައިކޯޓުން ބޭރު

ކުރީގެ ނައިބު ރައީސް އަބްދުﷲ ޖިހާދަށް އުފުލި ދައުވާ ކްރިމިނަލް ކޯޓުން ބޭރު ކޮށްލި މައްސަލަ ހައި ކޯޓުގައި ދެވަނަ ފަހަރަށް އިސްތިއުނާފު ކުރުމުންވެސް މައްސަލަ ބޭރުކޮށްލައިފި އެވެ. ޖިހާދުގެ މައްޗަށް 2020 ވަނަ އަހަރު ދައުވާ އުފުލާފައިވަނީ ފުށިދިއްގަރު ފަޅު ސްޕެޝަލް ޓޫރިޒަމް ޒޯނެއްގެ ގޮތުގައި ތަރައްގީ ކުރުމަށް ފައިނޭންސް މިނިސްޓަރަކަށް ހުންނަވައި ޖިހާދު ސޮއި ކުރެއްވި މައްސަލައިގަ އެވެ. މި މައްސަލައިގައި ޖިހާދުގެ މައްޗަށް އުފުލާފައިވަނީ، ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް ޢަމަލު ކުރުމުގެ ކުށުގެ ދައުވާ އެވެ. މައްސަލަ ނުބެލޭނެ ކަމަށް ކަނޑައަޅައި ކްރިމިނަލް ކޯޓުން ނިންމި ނިންމުން 11 އޮގަސްޓު 2024 ގައި ދިވެހިރާއްޖޭގެ ހައިކޯޓުގައި އިސްތިއުނާފު ކޮށްފަ ދައުލަތުން އިސްތިއުނާފުކުރި ނަމަވެސް ޖިހާދުގެ އެޑްރެސް ސާފު ނުވާތީ ކޯޓަށް ހާޒިރު ނުކުރެވުމުން އެ މައްސަލަ ވަނީ ހައި ކޯޓުން އޭރު ބޭރުކޮށްލާފަ އެވެ. އެ މައްސަލަ އަލުން ހުށަހެޅުމަށް ޕީޖީ އޮފީހަށް ހައި ކޯޓުން ދިނީ 15 ދުވަހުގެ މުއްދަތެކެވެ. ދެވަނަ ފަހަރަށް  އެ މައްސަލަ ހައި ކޯޓުން ބޭރުކޮށްލީ މައްސަލަ ހުށަހަޅަން ދިން 15 ދުވަހުގެ މުއްދަތުގެ 2 ދުވަސް ފަހުން މައްސަލަ ހުށަހެޅުމުންނެވެ.