ސައިންސް އާއި ހިސާބު މާއްދާގެ ޓީ.އޯ.ޓީގެ ދެވަނަ ބުރު ނިންމާލައިފި؛ 198 ޓްރެއިނަރުން ތަމްރީނުވި

ސާނަވީ ތައުލީމުގެ ފެންވަރު މަތިކުރުމަށްޓަކައި ސައިންސާއި ހިސާބު މާއްދާއަށް ހާއްސަކޮށްގެން ބޭއްވި "ޓްރެއިނިންގ އޮފް ޓްރެއިނަރސް" މަސައްކަތު ބައްދަލުވުމުގެ ދެވަނަ ބުރު ނިންމާލައިފިއެވެ. ދެ ބުރަކަށް ބަހާލައިގެން ބޭއްވި މި ޓީއޯޓީގައި މާލެއާ އަތޮޅުތެރޭގެ 198 ސްކޫލަކުން ޖުމްލަ 198 ޓްރެއިނަރުން ވަނީ ތަމްރީނުވެފައެވެ. އެއީ ސައިންސް މާއްދާއަށް 97 ޓްރެއިނަރުންނާއި ހިސާބު މާއްދާއަށް 101 ޓްރެއިނަރުންނެވެ. މި މަސައްކަތު ބައްދަލުވުމުގެ މައިގަނޑު މަގްސަދަކީ ކީސްޓޭޖް 3 އަދި 4ގެ ސައިންސް އަދި ހިސާބު މާއްދާ ކިޔަވާ ދަރިވަރުންގެ ފެންވަރު މަތިކުރުމަށްޓަކައި، މިމާއްދާތައް އުނގަންނައިދެއްވާ ޓީޗަރުންނަށް ބޭނުންވާ ފަންނީ ގާބިލުކަމާއި އަދި ހާއްސަކޮށް އެ ބޭފުޅުންގެ ކިޔަވައިދިނުމުގެ ހުނަރާއި ޕެޑަގޮޖިކަލް ކޮންޓެންޓް ނޮލެޖް ތަރައްގީކުރުމެވެ. މި ތަމްރީނު ފުރިހަމަކުރެއްވި މުދައްރިސުން، އެ ބޭފުޅުން މަސައްކަތްކުރައްވާ ސްކޫލުތަކާއި އަތޮޅުގެ އެހެނިހެން ސްކޫލުތަކުގައި މި މާއްދާތައް ކިޔަވައިދެއްވާ އެހެން މުދައްރިސުންނަށް މި ތަމްރީނު ފޯރުކޮށްދެއްވުމަށްޓަކައި ސެޝަންތައް ކުރިއަށްގެންދަވާނެއެވެ. ޓީއޯޓީގެ ދެވަނަ ބުރަށް ނިންމުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ ސްޓޭޓް މިނިސްޓަރ ޑރ. ޢަބްދުއްލަޠީފް މުޙައްމަދުއެވެ.