އަންނަ ހަފުތާ: ފްލެޓް ލިސްޓް އާންމުކުރަން މިނިސްޓަރު ދެއްވި އައު މުހުލަތު

ގެދޮރުވެެރިޔާ ސްކީމުގެ ދަށުން ފުރަތަމަ 4،000 ފުލެޓު ލިބޭ މީހުންގެ ލިސްޓު، ދައްޗެއް ކުރިމަތި ނުވާނަމަ މި ހަފްތާ ނިމުމުގެ ކުރިން އިއުލާނު ކުރައްވާނެ ކަމަށް ހައުސިން މިނިސްޓަރ އަލީ ހައިދަރު ވިދާޅުވެއްޖެ އެވެ. ހައިދަރު މިހެން ވިދާޅުވީ އޮންލައިން ނޫހަކަށް ދެއްވި އިންޓަވިއުއެއްގަ އެވެ. މިދިޔަ ޖުލައި 29، ގައި ރައްޔިތުންގެ މަޖިލީހުގެ ޕެޓިޝަން ކޮމެޓީއަށް މިނިސްޓަރު ހައިދަރު ހާޒިރުކޮށް ސުވާލު ކުރުމުން ވިދާޅުވީ، މަސައްކަތް ކުރަމުން ދަނީ ގެދޮރުވެރިޔާ ސްކީމުގެ ދަށުން ދޫކުރުމަށް އަޅާ އިމާރާތްތަކުގެ މަސައްކަތްތައް ނިމުމުގެ ކުރިން ފުލެޓު ލިބޭ މީހުންގެ ފައިނަލް ލިސްޓެއް އެކުލަވައިލެވޭތޯ ކަމަށެވެ. އިންޑިއާގެ އެހީތެރިކަމާއެކު ހުޅުމާލޭގައި އިމާރާތް ކުރި 700 ހައުސިން ޔުނިޓުގެ މަސައްކަތްތައް ނިންމައި މިމަހުގެ ހަތް ވަނަ ދުވަހު އެގައުމުގެ ސަރުކާރުން ވަނީ ރާއްޖޭގެ ސަރުކާރާ އެ ތަންތަން ހަވާލުކޮށްފަ އެވެ.