ސަޕްލިމެންޓްރީ ބަޖެޓް ދިރާސާކުރުމަށް މަޖިލީހުން ދިނީ އެންމެ ދުވަހެއް!

ސަރުކާރުން ހުށަހަޅާފައިވާ ސަޕްލިމެންޓަރީ ބަޖެޓް ދިރާސާކޮށް ނިންމުމަށް މަޖިލީހުން ބަޖެޓް ކޮމިޓީއަށް ދިނީ އެއް ދުވަހުގެ މުއްދަތެކެވެ. މިގޮތަށް މަޖިލީހުން ފާސްކޮށްފައިވަނީ މަޖިލީހުގެ 69 މެންބަރުންގެ އިއްތިފާގުން ނެވެ. ސަރުކާރުން މަޖިލީހަށް ހުށަހަޅާފައިވާ ސަޕްލިމެންޓަރީ ބަޖެޓްގެ އަދަދަކީ 5.1 ބިލިއަން ރުފިޔާ އެވެ. މެޖޯރިޓީ ލީޑަރު އިބްރާހިމް ފަލާހް ހުށަހެޅުއްވި ގޮތުގައި، މިއަދު މެންދުރު 1:30 އިން ފެށިގެން ބަޖެޓް ބަހުސް ފަށައި، ބަހުސް ނިމެންދެން ކުރިއަށް ގެންދިއުމަށާއި ކޮންމެ މެންބަރަކަށް 5 މިނެޓްގެ ވަގުތުކޮޅެއް ދިނުމަށް ހުށަހެޅުއްވި އެވެ. އަދި ބަހުސް ނިމުމުން ބަޖެޓް ކޮމިޓީއަށް ފޮނުވައި، ކޮމިޓީ ރިޕޯޓު ތަޅުމަށް ހުށަހެޅުމުން ރިޕޯޓަށް ބަހުސްކުރުމަށް ކޮންމެ މެންބަރަކަށް 2 މިނެޓްގެ ފުރުސަތެއް ދިނުމަށްވެސް ހުށަހެޅުއްވި އެވެ.