ބަޖެޓުން އަދި ހަރަދުވީ 37 ބިލިއަން ރުފިޔާ

ރައްޔިތުންނަށް މަންފާއެެއް ނެތް ގޮތުގައި މިއަހަރުގެ ބަޖެޓް ހުސްކޮށްލައިފި ކަމަށް އިދިކޮޅު ފަރާތްތަކުން ބުނަމުން ދިޔަކަމުގައި ވިއަސް، ފިނޭންސް މިނިސްޓްރީން އެކަން ދޮގުކޮށްފިއެވެ. އާންމުންގެ ކަންބޮޑުވުންތަކާ ގުޅިގެން ނޫސްވެރިން ކުރި ސުވާލުތަކަށް ޖަވާބުދެމުން ފިނޭންސް މިނިސްޓްރީން ބުނެފައިވަނީ ސެޕްޓެންބަރު މަހުގެ ނިޔަލަށް ދައުލަތުގެ ހަރަދުތަކަށް ހޭދަކޮށްފައިވަނީ ޖުމްލަ 37.4 ބިލިއަން ރުފިޔާ އެވެ. މި އަހަރު ބަޖެޓުގައި ހަރަދުކުރުމަށް ފާސްކޮށްފައިވަނީ 47.6 ބިލިއަން ރުފިޔާ އެވެ. މިއަހަރަށް މަޖިލީހުން ފާސްކޮށްފައިވާ ބަޖެޓުގައި ހިމެނޭ ބައެއް ދާއިރާތަކުގެ ޚަރަދު މަތިވާނެ ކަމަށް ބެލެވޭތީ ސަރުކާރުން މިއަދު 5 ބިލިއަން ރުފިޔާގެ ބަޖެޓެއް ހުށައަޅާނެއެވެ. މި އަހަރުގެ ސެޕްޓެންބަރު މަހުގެ ނިޔަލަށް ދައުލަތަށް 26.9 ބިލިއަން ރުފިޔާގެ އާމްދަނީއެއް ލިބިފައިވެ އެވެ. މުޅި އަހަރު ލިބޭނެ އާމްދަނީ ކަމަށް ބަޖެޓުގައި އަންދާޒާކޮށްފައިވަނީ 33.5 ބިލިއަން ރުފިޔާ އެވެ.