ސަރުކާރު: ޝުކުރިއްޔާ ބޭންކް އޮފް މޯލްޑިވްސް

ބޭރު ގައުމުތަކުގައި ތައުލީމު ހާސިލްކުރަމުންދާ ދަރިވަރުންނަށް ބޭންކް އޮފް މޯލްޑިވްސް (ބީއެމްއެލް)ގެ ރުފިޔާ ޑެބިޓް ކާޑުތަކުން ޑޮލަރު ލިބޭ މިންވަރު އިތުރުކޮށްދިނުމަށް ނިންމި ނިންމުމަށް ސަރުކާރުން ޝުކުރު އަދާކޮށްފި އެވެ. ރައީސް އޮފީހުން ނެރުނު ނޫސްބަޔާނެއްގައި ބުނެފައިވަނީ، މި އަންނަ މަހުގެ 1 އިން ފެށިގެން ބޭރުގައި ކިޔަވާ ދަރިވަރުންނަށް ބީއެމްއެލްގެ ރުފިޔާ ޑެބިޓް ކާޑުތަކުން ޑޮލަރު ލިބޭ މިންވަރު 1200 ޑޮލަރަށް އިތުރުކޮށްދިނުމަށް ބޭންކުން ނިންމާފައިވާ ނިންމުމަކީ އެ ކުދީންނަށާއި އެ ކުދީންގެ އާއިލާތަކަށް ލިބޭ ވަރަށް ބޮޑު ފަސޭހައަކަށް ވާނެ ކަމަށެވެ. މި ނިންމުމަކީ 24 ޑިސެމްބަރު 2023 ގައި، ވަޒީރުންގެ މަޖިލީހުގެ ލަފާގެ މަތީން ރައީސުލްޖުމްހޫރިއްޔާ ނިންމަވާފައިވާ ނިންމެވުމެއް ތަންފީޒުކުރަން ފެށްޓެވުމަށް ފުރަތަމަ ކުރައްވާ ކަމެއްގެ ގޮތުގައި ބޭންކުން އަޅުއްވާފައިވާ ފިޔަވަޅެއްކަން ސަރުކާރުން ފާހަގަކޮށްފައިވެ އެވެ.