ތިން މިލިއަން ރުފިޔާގެ މަސްތުވާތަކެތި އެތެރެކުރި މީހާގެ ބަންދަށް 15 ދުވަސް

ލަގެޖުން 1.8 ކިލޯގެ މަސްތުވާތަކެތި ފެނިގެން ވީއައިއޭއިން ހައްޔަރުކުރި މީހާ 15 ދުވަހަށް ބަންދުކޮށްފި އެވެ. ކޯޓު އަމުރުގައި ބުނެފައިވަނީ ހައްޔަރުކުރި މީހާގެ ކުށުގެ ރެކޯޑު އޮންނަ ކަމަށެވެ. ކަސްޓަމްސްއިން ރޭ ނެރުނު ބަޔާނުގައި ބުނީ މަސްތުވާތަކެތި އަތުލައިގަތީ ހޮނިހިރު ދުވަހު ބެންކޮކްގެ ފްލައިޓަކުން ރާއްޖެއައި ދިވެއްސެއްގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، އިތުރަށް ބަލައިފާސްކުރުމުގެ ތެރޭގައި ކަމަށެވެ. ފެނުނު މަސްތުވާތަކެތި މެފެޑްރޯންއަށް ޕޮޒިޓިވްވެފައިވާ ކަމަށް ކަސްޓަމްސްއިން ބުނި އެވެ. ކަސްޓަމުން ބުނީ އެ ތަކެތީގެ މަގުމަތީ އަގަކީ 3.3 މިލިއަން ދިވެހި ރުފިޔާކަމަށް ލަފާކުރެވޭ ކަމަށެވެ