ބެންކޮކުން ރާއްޖެގެނައި 3 މިލިއަން ރުފިޔާގެ ޑްރްގްސް އަތުލައިގަނެ ދިވެއްސަކު ހައްޔަރުކޮށްފި

ރާއްޖެއަށް އެތެރެކުރަން އުޅުނު 1ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން އަތުލައިގެންފިއެވެ. މަސްތުވާތަކެތި އަތުލައިގެންފައިވަނީ މިދިޔަ ހޮނިހިރު ދުވަހު ވައިގެ މަގުން ބެންކޮކުން ރާއްޖެ އައި އުމުރުން 33 އަހަރުގެ ދިވެހި ފިރިހެނެއްގެ ލަގެޖުންނެވެ. ކަސްޓަމްސްއިން ވިދާޅުވީ މިތަކެތި އަތުލައިގެންފައިވަނީ ދިވެހި ފިރިހެނެއްގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، އިތުރަށް ބަލައިފާސްކުރުމުގެ ތެރޭގައިކަމަށެވެ. އަދި އޭނާގެ ލަގެޖުން ފެނުނު މަސްތުވާތަކެތި ކަމަށް ޝައްކު ކުރެވޭ ތަކެތި، ފުރަތަމަ މަރުހަލާގައި ކަސްޓަމްސް އިން ތަޙުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ މެފެޑްރޯން (Mephedrone) އަށް ވަނީ ޕޮޒިޓިވް ވެފައިވާކަމަށެވެ. މިތަކެތީގެ ބަރުދަނުގައި ޕެކިންއާއެކު ޖުމްލަ 1.86 ކިލޯ ހުރިއިރު، މިތަކެތީގެ މަގުމަތީ އަގަކީ 3,348,000.00 (ތިން މިލިއަން ތިންލައްކަ ސާޅީސް އަށްހާސް) ދިވެހި ރުފިޔާކަމަށް ލަފާކުރެވޭކަމަށް ކަސްޓަމްސްއިން ވިދާޅުވެއެވެ. ކަސްޓަމްސްއިން ވިދާޅުވި ގޮތުގައި މި މައްސަލަ އިތުރަށް ތަޙްޤީޤްކުރުމަށްޓަކައި، މައްސަލައިގައި އަތުލައިގަނެވުނު މަސްތުވާތަކެއްޗާއި ފަސިންޖަރު މިހާރު ވަނީ ދިވެހި ފުލުހުންގެ ޚިދުމަތާއި ހަވާލުކޮށްފައެވެ.