ސިޓީކައުންސިލުން ޓޫރިޒަމް ޒޯނަކަށް ކަނޑައަޅާފައިވާ ތަނެއް، އެނގުމަކާ ނުލާ ސިފައިންގެ ބޭސްއެއް އެޅުމަށް ދިނުމުން އައްޑޫ މޭޔަރު ނުރުހުން ފާޅުކުރައްވައިފި

ސިޓީކައުންސިލުން ޓޫރިޒަމް ޒޯނަކަށް ކަނޑައަޅާފައިވާ ތަނެއް، އެނގުމަކާ ނުލާ ސިފައިންގެ ބޭސް އެއް އެޅުމަށް ދިނުމުން އައްޑޫ މޭޔަރު ނުރުހުން ފާޅުކުރައްވައިފިއެވެ. ގަމުގެ ދެކުނުން ޓޫރިޒަމް ޒޯނެއްގެ ގޮތުގައި އައްޑޫ ކައުންސިލުން ކަނޑައަޅާފައިވާ ސަރަހައްދެއް ސިޓީ ކައުންސިލްގެ ބަހެއްނެތި ސިފައިންގެ ބޭސްއެއް ގާއިމް ކުރުމަށް ދިނުމާގުޅިގެން އައްޑޫސިޓީގެ މޭޔަރު އަލީ ނިޒާރު ނުރުހުން ފާޅުކުރައްވައިފިއެވެ. އެކަމާ ގުޅޭގޮތުން އެމަނިކުފާނު އެކްސް ގައި ކުރައްވާފައިވާ ޕޯސްޓެއްގައި ބުނެފައިވަނީ އައްޑޫ ސިޓީ ގަމަކީ އައްޑޫ ސިޓީ ތަރައްގީގެ ޕްލޭންތަކާއި ގުޅިފައިވާ މުހިންމު މަސައްކަތް ތަކެއް ހިގަމުންއަންނަ މަރުކަޒެއް ކަމަށާއި، އެގޮތުން ގަމުގެ ދެކޮޅުގައި ޓޫރިސްޓް ހޮޓަޅެއް ތަރައްގީ ކުރުމަށް ޕްލޭން ކޮށްފައިވަނިކޮށް އައްޑޫ ކައުންސިލައްވެސް އަދި އައްޑޫގެ މެންބަރުންނަށްވެސް ނޭނގި ގަމުގެ އެ ސަރަޙައްދު ސިފައިންގެ ބޭސް އެއް އެޅުމަށް ދިނުމަކީ އައްޑޫގެ ތަރައްގީއަށް ބޮޑެތި ހުރަސްތަކެއް އެޅޭނެ ކަމެއްކަމަށެވެ. އަދި އިތުރަށް އެމަނިކުފާނުގެ ޕޯސްޓްގައި ވިދާޅުވެފައިވަނީ ސަރުކާރުގެ އެ ނިންމުމަކީ އައްޑޫ އެއާޕޯޓްސް ކޮމްޕަނީގެ ވިސްނުމާ ދެކޮޅަށް އަދި އައްޑޫ ސިޓީކައުންސިލަށް ވެސް އެނގުމެއްނެތި، އޭގެ އިތުރުން އައްޑޫގެ މަޖޖިލިސް މެންބަރުންނަށްވެސް އެނގުމެއްނެތި ކޮށްފައިވާ ކަމެއްކަން ހިތާމަޔާއިއެކު ފާހަގަކުރާ ކަމަށާއި، އެގޮތަށް އެކަން ކުރުމަކީ ރުހެވޭނެ ކަމެއް ނޫންކަމަށާއި، އެފަދަ ކަންކަމުގައި މަޝްވަރާކޮށްގެން އައްޑޫގެ ތަރައްގީގެ ޕްލޭންތަކާ އެއްގޮތައް އައްޑޫގެ ކޮންމެތާކުންވެސް ސިފައިންނާ ފުލުހުންނަށް ބޭނުންވާ ބިންތައް ދިނުމަށް އެއްބަސްވާނެ ކަމަށްވެސް ބަޔާންކޮސްފައިވެއެވެ. އަދި މާޒީގައި އެފަދަ ކަންކަމުގައި އެގޮތަށް އެކައުންސިލުން އަމަލުކޮށްފައިވާނެކަމަށްވެސް މޭޔަރުގެ ޕޯސްޓްގައި ބަޔާންކޮފައިވެއެވެ.