ކޮމިއުނިސްޓް ޕާޓީ އޮފް ޗައިނާ އިން އެހެން ބުނެފައިވަނީ އެ ޕާޓީގެ ދައުވަތަކަށް ދިވެހި ރާއްޖޭގެ ވެރިކަންކުރާ ޕާޓީ (ޕީއެންސީ) ގެ އިސްބޭފުޅުންގެ ވަފްދަކުން ޗައިނާ އަށް މިހާރުކުރައްވަމުންގެންދަވާ ދަތުރުގައި ކޮމިއުނިސްޓް ޕާޓީގެ އިންޓަނޭޝަނަލް ލިއޭޒަން ޑިޕާޓްމެންޓުގެ މިނިސްޓަރ ލިއު ޖިއަންޗޯއާ އާއި ބައްދަލުކުރެއްވުމުގެ ތެރެއިން އެ ޕާޓީގެ ފަރާތުން ދެއްކެވި ވާހަކަފުޅުގައެވެ
އެ ބައްދަލުކުރެއްވުމުގައި ޕީއެންސީގެ ވަފްދުގެ ފަރާތުން އިސްކޮށް ބައިވެރިވެ ވަޑައިގެންނެވީ ރާއްޖޭގެ ޓްރާންސްޕޯރޓް މިނިސްޓަރ މުޙައްމަދު އަމީން އެވެ. ޕީއެންސީ ގެ ފަރާތުން މިނިސްޓަރ އަމީނުގެ ދެއްކެވި ވާހަކަފުޅުގައި ދެ ޤައުމުގެ މެދުގައި އޮތް އެކުވެރި ގުޅުމަކީ ޒަމާންވީ ގުޅުމެއްކަން ފާހަގަކުރައްވައި، ރާއްޖޭގެ އިޤުތިޞާދީ އިޖުތިމާޢީ ކުރިއެރުމަށް ޗައިނާއިން ދެމުންދާ އެހީތެރިކަމަށް ޝުކުރު އަދާކުރެއްވިއެވެ. އަދި ވިޔަފާރިއާއި ދަތުރުފަތުރާއި، ސަގާފީ ދާއިރާއިން އިތުރަށް ގުޅުން ބަދަހިވުމަށް އެދިވަޑައިގަންނަވާކަން ފާހަގަކުރެއްވެވިއެވެ.
އަދި ދައުލަތް ހިންގުމުގެ ތަޖުރިބާތައް ހިއްސާކުރުން އިތުރުކޮށް، ގިނަ ގައުމުތައް ޝާމިލުވާ ގޮތަށް ސަރަހައްދީ ތަރައްޤީގެ މަސައްކަތްތައް އިތުރަށް ހަރުދަނާކުރުމުގައި ޗައިނާއާއެކު ރާއްޖެއިން އަބަދުވެސް މަސައްކަތްކުރާނެކަމުގެ ޔަޤީންކަން މިނިސްޓަރ އަމީންގެ ވާހަކަފުޅުގައި ވަނީ ދެއްވާފައެވެ.
