އުންމީދު، ކަފާލާތުގެ ދަށުން މިނިވަން ކުރެވޭނެ ގާނޫނެއްގެ ޥާހަކަ

ކޮންމެ މައްސަލައެއްގައި މުއްދަތު ޖަހާފައި ބަންދުގައި ބެހެއްޓުމުގެ ބަދަލުގައި ކަފާލާތުގެ ދަށުން މިނިވަން ކުރެވޭނެ ނިޒާމެއް ވަކި ގާނޫނަކާ އެކު ގެންނަން ޖެހޭ ކަމަށް ހުސްވެފައިވާ ޕްރޮސިކިއުޓަ ޖެނެރަލް (ޕީޖީ) ކަމުގެ މަގާމަށް އައްޔަންކުރުމަށް ރައްޔިތުންގެ މަޖިލިހުގެ ޖުޑިޝަރީ ކޮމިޓީން ފާސްކޮށްފައިވާ އައްބާސް ޝަރީފް ވިދާޅުވެއްޖެ އެވެ. ޕީޖީގެ މަގާމަށް ބޭފުޅަކު އައްޔަންކުރުމުގެ މަސައްކަތް ކުރަމުން ދަނީ މަޖިލިހުގެ ދައުރުން ބޭރުގަ އެވެ. އެގޮތުން މިދިޔަ ބުދަ ދުވަހުގެ ރޭ ދައުރުން ބޭރުގައި ބޭއްވި ހާއްސަ ޖަލްސާއަށް ރައީސް ޑރ. މުހައްމަދު މުއިއްޒު ފޮނުއްވި އައްބާސްގެ ނަން ދިރާސާކުރުމަށް ކޮމިޓީއަށް ފޮނުވާފައެވެ.  ބައްދަލުވުމުގައި ކޮމިޓީގެ މުގައްރިރު މަނަދޫ ދާއިރާގެ ކޮންގްރެސް ޕާޓީގެ މެމްބަރު ހުސްނީ މުބާރިކު ވަނީ ޖިނާއީ އަދުލުގެ ނިޒާމު ހަރުދަނާ ކުރުމަށް ދެކިވަޑައިގަންނަވާ ތަސައްވަރާ ގުޅޭގޮތުން ސުވާލު ކުރައްވާފަ އެވެ. އެ ސުވާލަށް ޖަވާބު ދެއްވަމުން އަައްބާސް ވިދާޅުވީ ޖިނާއީ އަދުލުގެ ނިޒާމަކީ ހަމައެކަނި ޕްރޮސިކިއުޓަ ޖެނެރަލް އޮފީސް އެކަނި ހިމެނޭ ނިޒާމެއް ނޫން ކަމަށެވެ. އެ އޮފީހުގެ އިތުރުން އެޓާނީ ޖެނެރަލާއި ތަހުގީގީ އިދާރާތަކާއި ކޯޓުތަކާ އަދި މަޖިލިސް ވެސް ހިމެނޭ ނިޒާމެއް ކަމަށެވެ. ތަސައްވަރަކީ ކުރިން ލިބިފައިވާ މައުލޫމާތުގެ އަލީގައި އަދި މިހާރު ކަންކަން ހިނގަމުން އަންނަ ގޮތް ރަނގަޅަށް ދިރާސާ ކުރުމަށް ފަހުގައި ކަމާ ގުޅުންހުރި ހުރިހާ ފަރާތްތަކާ އެކު މަޝްވަރާކޮށް، ނިޒާމަކީ ގެއްލިފައިވާ އިތުބާރު އަލުން އިއާދަކުރުން ކަމަށެވެ. އެގޮތުން ހާމަކަން ބޮޑު ގޮތެއްގައި އިންސާފުވެރިކަމާ އެކު މަސައްކަތްކުރާ، އަވަސް ހިދުމަތެއް ލިބޭ ތަނަކަށް ދާއިރާ ހެދުން ކަމަށެވެ. ޝަރީއަތް ނިމެންދެން ބަންދުގައި ތިބެން ޖެހޭ ޖެހުމަށް ހައްލު ހޯދުމަށް ގެންގުޅުއްވާ ތަސައްވަރާ ގުޅޭގޮތުން އައްބާސް ވިދާޅުވެފައި ވަނީ މައްސަލައިގެ ތަހުގީގު ފެށޭ ހިސާބުން ޝަރީއަތް ނިމެންދެން ބަންދުކުރަން ޖެހޭ އުސޫލަކީ ގާނޫނު އަސާސީގެ ދަށުން ބަޔާންކޮށްފައި އޮންނަ އުސޫލެއް ކަމަށެވެ.