ހަރުދަނާ މާލީ ސިޔާސަތެއް އަދިވެސް ތަންފީޒެއް ނުވޭ

މިއީ ޒިންމާދާރު މާލީ ސިޔާސަތު  ކުރިއަށް ނެރެންވީ ވަގުތުކަމަށް ވިދާޅުވެ ކުރީގެ ފިނޭންސް މިނިސްޓަރު އިބްރާހިމް އަމީރުގެ ނުރުހުން ސަރުކާރަށް އޮއްސާލައްވައިފި އެވެ. ނިމިގެން ދިޔަ ހަފްތާގައި ބައިނަލްއަގުވާމީ ކްރެޑިޓް ރޭޓިން އޭޖެންސީ، މޫޑީޒްއިން ރާއްޖޭގެ ކްރެޑިޓް ރޭޓިން ސީއޭއޭ2 އަށް ދަށްކޮށް، އިތުރަށް ޑައުންގްރޭޑް ކުރުމަށް ރިވިއުގެ ހާލަތަށް ގެނެސްފައިވާ އިރު ސަރުކާރުން ވަނީ އިގުތިސާދީ ހާލަތުން އަރައިގަތުމަށް އަޅަން ޖެހޭ އިސްލާހީ ފިޔަވަޅުތައް ތަންފީޒުކުރާނެ ކަމަށް ބުނެފަ އެވެ. އެކަމާ ގުޅިގެން އަމީރު  އެކްސްގައި މިއަދު ވިދާޅުވީ މި ސަރުކާރުގެ ނުކުޅެދުންތެރިކަމުން ބޮއްސުންލާފައިވާ ސަރުކާރުގެ މާލީ ހާލަތު ރަގަޅުކުރަން، އިތުބާރުހިފޭ ރަނގަޅު ސިޔާސަތެއް ސަރުކާރަށް އަދިވެސް ތަންފީޒު ނުކުރެވުމަކީ ކަންބޮޑުވާންޖެހޭ ކަމެއް ކަމަށެވެ. އަދި ސަރުކާރުގެ އަމަލުތައް އަދިވެސް ހުރީ ގޯހުން ގޯހަށް ކަމަށާއި ސިޔާސީ މުވައްޒަފުން އިތުރަށް ނެގުން ނުހުއްޓި ސަރުކާރު ކުންފުނިތަކުން ވެސް ސިޔާސީ މުވައްޒަފުން މަދު ނުވާ ކަމަށް އަމީރު ވިދާޅުވި އެވެ. އޭގެ އިތުރުން ސަރުކާރު ކުންފުނިތަކުގެ ކޮރަޕްޝަން އިންތިހާއަށް އިތުރުވެ ސަރުކާރު ފަރާތުން ރޭވިގެން ހިންގޭ ޖަރީމާއެއްގެ ތެރެއިން، މާލީ ނިޒާމު އެއްކޮށް ގަޑުބަޑުކޮށް އިތުބާރު ގެއްލުވާލައިފައިވާ ކަަމަށް އަމީރު ތުހުމަތު ކުރެއްވި އެވެ. އަމީރު ވިދާޅުވި މިހާރު ވިޔަފާރިތައް އެއްކޮށް އިދަޖެހި، ކުދި އަދި މެދު ފަންތީގެ ވިޔަފާރިތައް ވެސް އޮތީ ހުއްޓިފައި ކަމަށެވެ.