ތައިލެންޑުގައި ފެންބޮޑުވެ 22 މަރު

ތައިލެންޑަށް މިހާރު ކުރަމުންދާ މޫސުމީ ވިއްސާރައިގެ ސަބަބުން ދިމާވި ފެން ބޮޑުވުމުގެ ޙާދިޘާތަކާއި ބިންގަނޑު ކަނޑައިގެން ދިއުމުގެ ޙާދިޘާތަކުގައި މަރުވި މީހުންގެ އަދަދު 22އަށް އަރައިފިއެވެ. އަދި އެ ޙާދިޘާތަކުގައި 19 މީހަކު ވަނީ ޒަޙަމުވެފައެވެ. އެ ޙާދިޘާތަކުގައި 30،000އަށްވުރެ ގިނަ ގެދޮރަށް ގެއްލުން ލިބިފައިވެއެވެ. އަދި ކުރިއަށް އޮތް ދުވަސްތަކުގައި އިތުރު ސަރަޙައްދުތަކަށް ވިއްސާރައިގެ އަސަރު ކުރާނެ ކަމުގެ އިންޒާރު ތައިލެންޑްގެ ރަސްމީ އިދާރާތަކުން ވަނީ ދީފައެވެ. މިދިޔަ ހަފުތާގައި އެ ޤައުމުގެ ފުކެޓަށް ބޯކޮށް ވާރޭވެހުމުގެ ސަބަބުން ހިނގައިދިޔަ ބިންގަނޑު ކަނޑައިގެން ދިޔުމުގެ ޙާދިޘާގައި 13 މީހަކު ވަނީ މަރުވެފައެވެ. އޭގެ ތެރޭގައި ރަޝިއާގެ ދެ މަފިރިންނާއި ތައިލެންޑްގެ ދެ މީހުންގެ އިތުރުން މިޔަންމާގެ ނުވަ މީހުން ހިމެނެއެވެ. އެ ޙާދިޘާގައި 20 މީހުންނަށް ވަނީ އެކިވަރުގެ އަނިޔާތައް ލިބިފައެވެ. އަދި 209 ގޭބީސީއަކަށް ވަނީ ގެއްލުންވެފައެވެ. ތައިލެންޑްގެ ބޮޑުވަޒީރު ޕޭޓޮންގޓާން ޝިނާވަތާ ވަނީ ހަފުތާ ބަންދުގައި ވިއްސާރައިގެ އަސަރުކުރި އުތުރުގެ ސަރަހައްދުތަކަށް ވަޑައިގެން އެ ސަރަޙައްދުތަކައި ދިރިއުޅެމުންދާ މީހުންގެ ހާލު ބައްލަވާފައެވެ. އަދި ބޮޑުވަޒީރު ވަނީ ހާލުގައިޖެހިފައިވާ މީހުންނަށް ކާބޯތަކެތި ބައްސަވާފައެވެ. ބޯކޮށް ވާރޭވެހުމުގެ ސަބަބުން ތައިލޭންޑްގެ ފަސް ޕްރޮވިންސެއްގައި ވަނީ ފެން ބޮޑުވެފައެވެ. އޭގެ ތެރޭގައި ޗިއަންގ ރައި ސުޚޯތައި އަދި ޕްރައޭ ޕްރޮވިންސް ހިމެނެއެވެ. އޭގެ އިތުރުން، އެ ޤައުމުގެ ވެރިރަށް ބެންކޮކް ހިމެނޭހެން، ޗައޯ ޕްރަޔާ ކޯރާ ކައިރި ސަރަހައްދު ތަކުގައި ފެން ބޮޑުވެދާނެކަމުގެ އިންޒާރު ވަނީ ދީފައެވެ.