ފަގީރުކަމުގެ ހަޔާތުން ލިބިދޭ ވޭނީ ފިލާވަޅެއް

ދަންވަރު، ބިރުވެރި ހުވަފެނެއް ފެނިގެން ހޭލެވުމުން އިޚުތިޔާރަކާއި، ނުލައި ގޮވައިލެވުނީ މަންމަ އަށެވެ. އެ ބިރުވެރި ކަމުގައި ހިނދުކޮޅަކު އޮތުމަށްފަހު، ރަނގަޅަށް ހޭލެވި، ތަންދޮރު އެނގެން ފެށުމުން އަހަންނަށް ވިސްނުނީ، އަހަރެން ދިރިއުޅެނީ މަންމައާ އެކު ނޫންކަމެވެ. ވަރަށް ގިނަ ރޭރޭ މި ދަތުރު ޖެހެއެވެ. ކުށްވެރިކުރަންވީ، ނޫނީ ބަދުނާމު ކުރަންވީ ކާކު ހެއްޔެވެ؟ ބައްޕަ ހެއްޔެވެ؟ މަންމަ ހެއްޔެވެ؟ ނޫނީ މިއީ އަހަރެންގެ ނަސީބު ހުރިގޮތް ހެއްޔެވެ؟ އަހަރެން ދުނިޔެއަށް ނޭވާލިތާ ދެ އަހަރުގެ ތެރޭގައި ބައްޕަގެ ބުއްދި ގޯސްވެއްޖެއެވެ. ނަފުސާނީ ގޮތުން ބަލި މީހަކަށް ވެއްޖެއެވެ. މަންމަ އެތައް ފަރުވާ އެއް ބައްޕައަށް ކުރި އެވެ. އެތައް ފައިސާއެއް ޚަރަދު ކުރިއެވެ. އެކަމުން ސަލާމަތް ވޭތޯއެވެ! އެހެނަސް ކުރިއެރުމެއް ނުލިބުނެވެ. ބައްޕައަކަށް ޝިފާ އެއް ނުލިބުނެވެ. އެހެންކަމުން މަންމަ ނިންމީ ބައްޕައާއި ވަކިވާށެވެ، ބައްޕަގެ ގާތުން ވަރިވާށެވެ. އަހަރެންގެ އުމުރުން އެންމެ ތިން އަހަރުގައި މަންމަ އެހެން މީހަކާއި އިނދެފިއެވެ. މަންމަ ބޭނުންވީ މަންމަ އާއި އެކު އަހަރެންވެސް ގެންދާށެވެ. އެކަން އެހެން ނުވީ އެ ފިރިހެނާ އެކަމާ ދެކޮޅު ހެދީމައެވެ. މަންމަ ދިޔައީ އަހަރެން މާމަ ޢާއި ހަވާލުކޮށްފައެވެ. ބަލި ބައްޕައާއި، މުސްކުޅި މާމައާއި އެކު އުޅެން ޖެހުމުން އަހަރެންގެ ދިރިއުޅުން ބަދަލުވީ ދަތި އުނދަގޫ ހަޔާތަކަށެވެ. މާމަ ކިތަންމެ މުސްކުޅި ނަމަވެސް އެ މާމައަށް ޖެހިފައިވަނީ ކާނާއަށް އެދި އަވަށްޓެރިންގެ ގޭގެއަށް ސަލާންޖަހަން ހިނގާށެވެ. އަހަންނާއި ބައްޕައަށް ކާން ދެވޭނެ އެހެން މަގެއް ފެންނާން ނެތީތީ އެވެ. މާމައަށް ހިރި ނުލެވޭ ދުވަހެއް ނަމަ ގެކައިރީ ވަލުތެރެއަށް ވަދެ ބައެއްކަހަލަ ފަތްޕިލާވެލި ގެނެސްގެން އެ މަޑުކޮށްގެން ކައި ހަދަމެވެ. އަހަރެމެންނަށް ކާން ނުދެވި އެކަމާ ހިތާމަކޮށް މާމަ ރޯތަން ބަލާކަށް އަހަންނަކަށް ކެތެއް ނުކުރެވޭނެ އެވެ. ކާނެ އެއްޗެއްް ނުލިބުނަސް، ހުސްބަނޑާ ހުރެވިޔަސް ކިޔެވުމަކީ އަހަންނަށް އުފާލިބޭ ކަމެކެވެ. ގެއާއި ޖެހިގެން ސުކޫލެއް ހުރެއެވެ. އެއީ އަހަރެން ކިޔަވަން ދިޔަ ސުކޫލެވެ. މާމައަށް ސުކޫލުފީ ނުދެއްކޭތީ މިހާރު އަހަރެން ކުލާހަކަށް ނުވަންނަމެވެ. ކިޔަވައިދޭ ވަގުތުތަކުގައި ކުލާހުން ބޭރުގައި އިށީނދެ އިންނަމެވެ. އަދި މުދައްރިސުން ނަންގަވައި ދެއްވާ ފިލާވަޅުތައް ކަނުލައި އަހަމެވެ. އެއިން އެއްޗެއް ދަސްވޭތޯ އެވެ. އެގޮތުން އަހަންނަށް ވަރަށް ގިނަ ޅެންތައް ހިތު ދަސްވެއްޖެއެވެ. އެހެންކުދިން ފަދައިން އަހަރެންވެސް ސުކޫލަށްދާން ބޭނުމެވެ. ކިޔަވާ މޮޅުކުއްޖަކަށް ވާން ބޭނުމެވެ. ކިޔަވައިގެން އަހަރެން ޢާއިލާ ބެލެހެއްޓޭނެ ފަދަ އާމްދަނީއެއް ލިބޭފަދަ މީހަކަށް ވާންވެސް ބޭނުމެވެ. އަހަރެން މަންމައަށް ނަފުރަތެއް ނުކުރަމެވެ. މަންމަ ދެކެ ލޯބިވުމާ، މަންމަ މަތިން ހަނދާން ކުރުމަކީ އުނދަގޫ ކަމަކަށް ވިޔަސް ވެހެވެ. އެހެނަސް މަންމަގެ މަތިން ހަނދާންވާ ކޮންމެ ފަހަރަކު ހިތަށް ތުރާވެ، ބަޔާންކޮށްދޭން ނޭނގޭ ކަހަލަ ތޫނު ތަދެއް މި ހިތުގައި އުފެދެއެވެ. ކަރުނަތައް މަތަނުވެ ކޯތާފަތް މައްޗަށް އޮހިގަނެއެވެ. މާމައާއި ބައްދަލު ކުރުމަށް ކޮންމެ ހަމަހަކުން އެއްފަހަރު މަންމަ އަންނާނެއެވެ. މަންމަ އެކަނި އަންނަ ފަހަރަކުވިއްޔާ ސިއްރުން މަންމައާއި ބައްދަލު ކުރެވޭނެއެވެ. އެފަދަ ރޭރޭ މަންމަގެ މޫނުމަތިން ފެންނަނީ ކުށްވެރިއެއް ކަމުގެ އިހްސާސްތަކެވެ. އަހަރެންގެ ގައިގައި ބައްދާލާ މެޔާ ބޮނޑި ކޮށްލާނެއެވެ. އެއްވެސް ވާހަކައެއް ނުދައްކާނެއެވެ. މަންމަގެ އެހިމޭންކަމާއި ރުއިން އަހަންނަށް ދޭހަވެއެވެ. ހަޔާތަކީ ކޮންކަހަލަ ދަތުރެއްކަން މިހާ ޅައުމުރުގައިވެސް އަހަންނަށް އިހުސާސް ކުރެވެން ފަށައިފިއެވެ. އަހަންނަށް ތަޖުރިބާ ކުރެވެނީ ހަމައެކަނި ހިތާމައެވެ. ހިތްދަތި ކަމެވެ. ރުއިމާއި ކަރުނަ އޮހޮރުމެވެ. އުފާވާކަށް އަހަންނަކަށް ނޭނގެއެވެ. ހިނިތުންވާނެ ފުރުޞަތެއް ނުލިބެއެވެ. އަމުދުން ނުވެސް އެނގެއެވެ. އެއްވެސް މީހަކު ހިތާމަކުރާތަން ދެކޭކަށް، ކަރުނަ އޮހޮރާތަން ބަލާކަށް އަހަންނަކަށް ކެތެއް ނުވާނެއެވެ. އަހަރެން ބޭނުންވަނީ އަވަހަށް ބޮޑުވާށެވެ. އޭރުން ޢާއިލާގެ ޒިންމާތަކާ އަހަންނަށް ހަވާލު ވެވޭނެއެވެ. ހިނިތުންވާން ދަސްކުރަން އަހަރެން ބޭނުމެވެ. އަހަރެންގެ އާއިލާގެ މެންބަރުން ހިނިތުންވާތަން ދެކެންވެސް އަހަރެން ބޭނުމެވެ.