ތައިލެންޑުގެ ދުސްތޫރީ ކޯޓުން ބޮޑުވަޒީރު މަގާމުން ވަކިކޮށްފި

ތައިލެންޑުގެ ބޮޑުވަޒީރު ސެއްތާ ތަވީސިން ޤާނޫނުއަސާސީއާ ޚިލާފުވެފައިވާ ކަމަށް ކަނޑައަޅައި, ބޮޑުވަޒީރު ކަމުގެ މަޤާމުން އޭނާ ދުރު ކުރަން ޙުކުމް ކޮށްފިއެވެ. ސެއްތާ ބޮޑުވަޒީރު ކަމުގެ މަޤާމުން ދުރު ކުރަން ޙުކުމް ކޮށްފައި ވަނީ ތައިލެންޑުގެ އެންމެ މަތީ ދުސްތޫރީ ކޯޓުންނެވެ. އޭނާ ޤާނޫނު އަސާސީއާ ޚިލާފުވެފައިވާ ކަމަށް ކަނޑައަޅާފައި ވަނީ, ޖަލު ޙުކުމެއް އިއްވާފައިވާ ބޭފުޅަކު ކެބިނެޓަށް ޢައްޔަން ކުރުމުގެ ކުށުގައެވެ. ބޮޑުވަޒީރު ކަމުގެ މަޤާމުން ސެއްތާ ދުރު ކުރުމާ އެކު, ފާއިތުވި 16 އަހަރުގެ ތެރޭގައި އެ މަޤާމުން ދުރު ކޮށްފައިވާ ބޭފުޅުންގެ ޢަދަދު ވަނީ ހަތަރަކަށް އުފުލިފައެވެ. އެ ހުރިހާ ބޭފުޅުން ވެސް މަޤާމުން ދުރު ކޮށްފައި ވަނީ ދުސްތޫރީ ކޯޓުންނެވެ. ސެއްތާ ވަކި ކުރުމުގެ ގޮތުން ކުރި ޙުކުމުގައި ކޯޓުން ބުނެފައި ވަނީ, ޤާނޫނު އަސާސީގައި ބަޔާން ކޮށްފައިވާ ޝަރުޠުތައް ފުރިހަމަ ނުވާ, އަދި އަޚުލާޤީ މިންގަނޑުތަކަށް ނުފެތޭ ބޭފުޅަކު އޭނާގެ ކެބިނެޓަށް ޢައްޔަން ކޮށްފައިވާ ކަން ސާބިތުވާ ކަމުގައެވެ. ސެއްތާ މަޤާމުން ދުރު ކޮށްފައި ވަނީ, ވެރިކަމާ ހަވާލުވެ ވަޑައިގެންނެވިތާ އަހަރެއް ވެސް ފުރިހަމަ ނުވަނީހެވެ. ސެއްތާގެ ބަދަލުގައި ބޮޑުވަޒީރު ކަމުގެ މަޤާމާ ދެން ހަވާލުވެ ވަޑައިގަންނަވާނެ ބޭފުޅެއް ކަނޑައަޅާނީ ތައިލެންޑުގެ ޤާނޫނު ހަދާ މަޖިލީހުންނެވެ. ސެއްތާ ވަކި ކުރުމާ އެކު, ހަލަބޮލިވެ, ހައިޖާނު ބޮޑުވެފައިވާ ތައިލެންޑުގެ ސިޔާސީ މަސްރަޙުގެ ހާލަތު އިތުރަށް ގޯސްވާނެ ކަމަށް މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ. އެއީ, ސެއްތާގެ ފިޔު ތައި ޕާޓީގެ ވެރިކަން ވައްޓައިލާފައިވާ ފުރަތަމަ ފަހަރެއް ނޫނެވެ. އަސްކަރިއްޔާއިން ބަޣާވާތްކޮށް އެ ޕާޓީގެ ދެ ސަރުކާރެއް ވައްޓައިލާފައިވެއެވެ. ޗިނަވާތު ޢާއިލާގެ ފިޔު ތައި ޕާޓީއާއި ތައިލެންޑުގެ ޝާހީ އަސްކަރިއްޔާއާ ދެމެދު ބޮޑު ނުތަނަވަސް ކަމެއް ވަނީ އުފެދިފައެވެ. ބޮޑުވަޒީރު ކަމުގެ މަޤާމުން ސެއްތާ ދުރު ކުރުމާ އެކު, ފިޔު ތައި ޕާޓީގެ ވެރިޔާ ތަކްސިން ޗިނަވާތާއި އަސްކަރިއްޔާއާ ދެމެދު އުފެދިފައި އޮތް ނުތަނަވަސް ކަން އިތުރަށް ގޯސްވެގެން ދާނެ ކަމަށް މަސްރަޙު ދިރާސާ ކުރާ ފަރާތްތަކުން ދެކެއެވެ. 15 އަހަރު އަމިއްލައަށް އަރުވައިލެވިގެން ހުންނެވުމަށް ފަހު ތަކްސިން އެނބުރި ޤައުމަށް ވަޑައިގަންނަވާފައި ވަނީ ސެއްތާ ބޮޑުވަޒީރު ކަމުގެ މަޤާމާ ހަވާލުވެ ވަޑައިގެންނެވި ދުވަހުއެވެ. ސެއްތާ މަޤާމުން ވަކި ކޮށްފައި ވަނީ އޭނާގެ ކެބިނެޓަށް ޕީޗީތް ޗޫންބާން ޢައްޔަން ކުރެއްވުމާ ގުޅިގެންނެވެ. ޕީޗީތަކީ ތަކްސިންގެ ޤާނޫނީ ވަކީލެވެ. 2008ވަނަ އަހަރު ކޯޓުގެ ޙުރުމަތް ކެނޑުމުގެ ކުށުގައި ޕީޗީތްގެ މައްޗަށް ޖަލު ޙުކުމެއް އިއްވާފައިވެއެވެ. އޭނާގެ މައްޗަށް އުފުލާފައި ވަނީ ކޯޓުގެ މުވައްޒަފުންނަށް ރިޝްވަތު ދިނުމުގެ ދަޢުވާއެވެ. ނަމަވެސް, އޭނާގެ މައްޗަށް އެ ކުށް ސާބިތު ކުރެވިފައެއް ނުވެއެވެ. އަދި, މޭ މަހު ޕީޗީތް ވަނީ ސެއްތާގެ ކެބިނެޓުން އިސްތިޢުފާ ދެއްވާފައެވެ. ސެއްތާ މަޤާމުން ވަކި ކުރުމާ އެކު, ބޮޑުވަޒީރު ކަމުގެ މަޤާމުގެ ޒިންމާތަކާ ވަގުތީ ގޮތުން ހަވާލުވެ ވަޑައިގަންނަވާނީ ބޮޑުވަޒީރުގެ ނައިބު ޕުމްތަމް ވޭޗަޔަޗާއީ ކަމަށް ބެލެވެއެވެ. ތައިލެންޑުގެ ދުސްތޫރީ ކޯޓުން ދާދި ފަހުން މޫވް ޕޯވަރޑް ޕާޓީ (އެމްއެފްޕީ) އުވައިލާފައިވާ ކަން ވެސް ފާހަގަ ކޮށްލަން ޖެހެއެވެ. އެއީ, އެންމެ ފަހުން ބޭއްވި ޢާންމު އިންތިޚާބުގައި ޤާނޫނު ހަދާ މަޖިލީހުގައި އެންމެ ގިނަ ދާއިރާއިން ގޮނޑި ކާމިޔާބު ކުރި ޕާޓީއެވެ. އެމްއެފްޕީ އުވައިލުމުން އެ ޕާޓީގެ މެންބަރުން ވަނީ އައު ޕާޓީއެއް އުފައްދާފައެވެ.