އިރާނުން ރަޝިޔާއަށް ސިއްރުން މިސައިލް ވިއްކަނީ، ޔޫރަޕުގެ ޖާސޫސީ އިދާރާތަކުގެ ރާޑަރަށް އަރައިފި

އީރާނުން ރަޝިޔާއަށް ބެލިސްޓިކް މިސައިލް ވިއްކަން ތައްޔާރުވަމުންދާ ކަމުގައި ހުޅަނގުގެ ޖާސޫސީ އިދާރާތަކުންތަކެއް ތުހުމަތު ކޮށްފިއެވެ. ނަން ހާމަކޮށްފައި ނުވާ ވިލާތުގެ ޤައުމުތަކެއްގެ ޖާސޫސީ އިދާރާގެ މަސްދަރުތަކުން ބުނެފައިވާ ގޮތުގައި އީރާނުން އުފައްދާ ފަތްޙް-360 މަރުކާގެ ކުރު-ރާސްތާ ބެލިސްޓިކް މިސައިލް ރަޝިޔާއަށް ވިއްކަން އީރާނުން ތައްޔާރުވަމުންދާ ކަމުގައެވެ. އަދި, އެ މަރުކާގެ މިސައިލް ބޭނުން ކުރުމުގެ ތަމްރީނުތައް ރަޝިޔާގެ ސިފައިން އީރާނުގައި ފުރިހަމަ ކުރަމުންދާ ކަމުގައެވެ. ވިލާތުގެ ޤައުމުތަކެއްގެ ޖާސޫސީ އިދާރާގެ މަސްދަރުތަކަކާ ހަވާލާ ދެމުން ހުޅަނގުގެ ނޫސްތަކުން ބުނެފައި ވަނީ ފަތްޙް-360ގެ އިތުރުން އެހެން މަރުކާގެ ބެލިސްޓިކް މިސައިލްތަކެއް ގަތުމަށް ރަޝިޔާއިން އީރާނާ އެކު 2023 ވަނަ އަހަރުގެ ޑިސެންބަރު 13ވަނަ ދުވަހު އެއްބަސްވުމެއްގައި ސޮއި ކޮށްފައިވާ ކަމުގައެވެ. އަދި, ކުރިއަށް އޮތް މަސްތަކުގެ ތެރޭގައި އީރާނުން އެތަކެއް ސަތޭކަ ބެލިސްޓިކް މިސައިލް ރަޝިޔާއަށް ފޯރުކޮށްދޭނެ ކަމަށް ބެލެވޭ ކަމަށެވެ. ރަޝިޔާއިން ގަންނަން މަސައްކަތް ކުރަމުންދާ ކަމަށް ހުޅަނގުން ތުހުމަތު ކުރާ ފަތްޙް-360 މަރުކާގެ ބެލިސްޓިކް މިސައިލަކީ 120 ކިލޯމީޓަރު ދުރުގައިވާ އަމާޒުތަކަށް ޙަމަލާ ދިނުމަށް ބޭނުން ކުރެވޭނެ, 150 ކިލޯގެ ގޮވާތަކެތި އުފުލުމުގެ ގާބިލު ކަން ލިބިފައިވާ ބާރުގަދަ ހަތިޔާރެކެވެ. ހުޅަނގުގެ ޖާސޫސީ އިދާރާގެ މަސްދަރުތަކުން ތުހުމަތު ކުރާ ގޮތުގައި, އެ ހަތިޔާރު ބޭނުން ކުރުމުގެ ތަމްރީނުތައް ރަޝިޔާގެ އޮފިޝަލުން ފުރިހަމަ ކޮށް ނިންމުމުން, އީރާނުން ރަޝިޔާއަށް ހަތިޔާރުތައް ފޯރުކޮށްދޭން ފަށާނެއެވެ.