ބަންގްލަދޭޝްގައި އަލުން މުޒާހަރާ ފެށީ ފުލުހުންގެ އަނިޔާވެރިކަމާ ދެކޮޅު ހެދުމަށް

ބަންގްލަދޭޝްގައި އަނެއްކާވެސް އާ މުޒާހަރާއެއް ފެށިއްޖެއެވެ. ޖުލައި މަހުގެ މުޒާހަރާ ނިމުނުތާ މާގިނއ ދުވަހެއް ނުވަނީސް އާ މުޒާހަރާއެއް ފެށި ވަރުގަދަ ވަމުންދާތީ ފުލުހުން ވަނީ އެންމެ މަތީ އެލާޓްގައި މަސައްކަތް ފަށާފައެވެ. އެތަކެއް ހާސް ބަޔަކު ވެރިރަށް ޑާކާގެ މަގުތަކަށް ނިކުމެފައި ވަނީ, ސަރުކާރު ވަޒީފާއަށް މީހުން ޢައްޔަން ކުރުމުގައި އަމަލު ކުރަމުން ދިޔަ ކޯޓާ ނިޒާމާ ދެކޮޅަށް ބޭއްވި މުޒާހަރާތައް ރޫޅައިލަން ފުލުހުން ބާރުގެ ބޭނުންކޮށް 150 މީހުން މަރައިލުމުން އެ ކަމާ މެދު ހިތްހަމަ ނުޖެހުން ފާޅު ކުރުމުގެ ގޮތުންނެވެ. ޖުލައި މަހު ކޮލެޖުތަކާއި ޔުނިވަރސިޓީތަކުގެ ދަރިވަރުން ބާއްވާފައިވާ މުޒާހަރާތަކަކީ, ހަތަރުވަނަ ދައުރަކަށް އިންތިޚާބު ވެފައިވާ ބޮޑުވަޒީރު ޝައިޚް ޙަސީނާގެ ސަރުކާރާ ދެކޮޅަށް މިހައިތަނަށް ކޮށްފައިވާ އެންމެ ބޮޑެތި މުޒާހަރާތަކެވެ. ޖަނަވަރީ މަހު ބޭއްވި އިންތިޚާބު ބޮއިކޮޓުކޮށް, އިދިކޮޅު މައި ޕާޓީ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ން އިންތިޚާބުގައި ބައިވެރިވެފައެއް ނުވެއެވެ. މުޒާހަރާތަކުގައި އެތަކެއް ހާސް ބަޔަކު ޒަޚަމު ކޮށްލައި 1,600އަށްވުރެ ގިނަ މީހުން ހައްޔަރު ކޮށްފައިވާތީ އެ ކަމާ މެދު ހިތްހަމަނުޖެހުން ފާޅު ކުރުމަށް ޑާކާގެ އިތުރުން އިރުއުތުރު ސިލޭޓް ޑިސްޓްރިކްޓުގެ މަގުތަކަށް ވެސް އެތަކެއް ހާސް ބަޔަކު ޖަމާވިއެވެ. ފުލުހުން ވަނީ ސިލޭޓްގައި ބޭއްވި ހިނގައިލުމުގައި ބައިވެރިވި މީހުން ހުއްޓުވަން ވެސް ބާރުގެ ބޭނުން ކޮށްފައެވެ. އެ މީހުންނާ ދެކޮޅަށް ކަރުނަ ގޭހާއި ސްޓަން ގްރިނޭޑް ފަދަ ހަތިޔާރު ބޭނުން ކޮށްފައިވާނެ ކަން އެ ސަރަހައްދުގެ ފުލުހުންގެ ކޮމިޝަނަރުގެ ނައިބު އަޛްބަހާރް ޢަލީ ޝައިޚް ކަށަވަރު ކޮށްދެއްވިއެވެ. މީގެ އިތުރުން, ދެކުނުގައި އޮންނަ ބަނދަރުމަތީ ރަށް ޗޮއްޓޮގްރާމާއި ބޮރީޝާލްގައި ވެސް ފުލުހުން ވަނީ ހިނގައިލުމުގެ ބައިވެރިންނާ ކުރިމަތިލާފައެވެ. ބޮރީޝާލްގައި ހިނގި ކުރިމަތިލުންތަކުގައި 10 މީހުން ޒަޚަމުވި ކަމަށް ރިޕޯޓުތައް ބުނާއިރު, އޭގެ ތެރޭގައި ނޫސްވެރިން ވެސް ހިމެނެއެވެ. ދާކާގެ ހައި ކޯޓުގެ އިމާރާތް ކައިރިއަށް އެއްވި މީހުންގެ ތެރެއިން ހަތް ދަރިވަރުން ފުލުހުންގެ ބެލުމުގެ ދަށަށް ގެންދިޔައެވެ. ދާކާގައި ބޭއްވި ހިނގައިލުމުގައި ޤާނޫނީ ވަކީލުންނާއި ޔުނިވަރސިޓީތަކުގައި ކިޔަވައިދެއްވާ މުދައްރިސުން ވެސް ބައިވެރިވިއެވެ. މުޒާހަރާތަކުގައި ފުލުހުން މަރައިލި 150އަށްވުރެ ގިނަ މީހުންނަށް އިންސާފު ހޯދައިދިނުމުގެ ނަމުގައި އެ ޤައުމުގެ އެކި ކަންކޮޅުތަކުގައި ހިނގައިލުންތައް އިންތިޒާމު ކޮށްފައި ވަނީ ތަފާތު ކުރުންތަކާ ދެކޮޅަށް ވަކާލާތު ކުރާ ދަރިވަރުންގެ ޖަމުޢިއްޔާ, ސްޓޫޑެންޓްސް އެގެއިންސްޓް ޑިސްކްރިމިނޭޝަނުންނެވެ. ޖުލައިގައި ބޭއްވި ބޮޑެތި މުޒާހަރާތައް އިންތިޒާމު ކުރުމުގައި ވެސް އެ ޖަމުޢިއްޔާއިން އިސް ދައުރެއް އަދާ ކުރިއެވެ.