ފާހާނާގެ ދޮރެއް ވައްޓައެއް ނުލަން، ހަލާކުކޮށްލީ އެޕާޓްމަންޓް ދޮރުގެ ތަޅު: ޕޮލިސް

އައްޑޫ ސިޓީގެ ހިތަދޫ ގައި އަންހެނަކު ފެންވަރަން ހުއްޓާ ފާނާގެ ދޮރު ވައްޓާލައި ފުލުހުން ވަންކަމަށް ބުނެ ސޯޝަލް މީޑިއާގައި ދައުރުވަމުންދާ ހަބަރު ފުލުހުން ދޮގުކޮށްފިއެވެ. މީޑިއާތަކަށް ފޮނުވި މެސެޖެއްގައި ފުލުހުން ބުނީ، އެގެއަށް ވަނީ މަސްތުވާތަކެތީގެ ތުހުމަތު ކުރެވޭތީ ބަލައި ފާސްކުރުމަށް ކޯޓުން ނެރުނު އަމުރަކާއި އެކުގައި ކަމަށެވެ. "އެޕާޓްމެންޓަށް ވަންނަން ދޮރު ހުޅުވުމަށް ތަކުރާރުކޮށް ފުލުހުން އެދުނެވެ. އެހެންނަމަވެސް ދޮރު ހުޅުވާފައި ނުވާތީ ފުލުހުން އެގެއަށް ވަނީ ބާރުގެ ބޭނުން ކޮށްގެން ތަޅު ހަލާކު ކޮށްލައިގެންނެވެ." ފުލުހުންގެ މެސެޖްގައި ބުނެފައިވެއެވެ. ގޭގެ އެތެރެއަށް ވަނުމަށްފަހު ދެ ކޮޓަރިއެއްގެ ދޮރު ހުޅުވަންވެސް ތަކުރާރުކޮށް ފުލުހުން އެދުނެވެ. ކޮޓަރީގެ ދޮރުވެސް ނުހުޅުވުމުން ފުލުހުންނަށް ވަންނަން ޖެހުނީ ބާރުގެ ބޭނުންކޮށްގެން ތަޅު ހަލާކުކޮށްލައިގެންނެވެ. ދެ ކޮޓަރީގެ ތެރެއިން އެއް ކޮޓަރީގެ ދޮރު ހުޅުވާފައި ވަތްއިރު އަންހެނަކު ފެންވަރައިގެން ނުކުމެ ކޮޓަރީގައި ހުރުމުން ފުލުހުން ވަނީ ދޮރުލައްޕައި އެމީހާ ކޮޓަރިން ނުކުތުމަށް ފުރުސަތު ދީފައި ކަމަށް ވެސް ފުލުހުންގެ ބަޔާނުގައި ވެއެވެ. މި އޮޕަރޭޝަންގައި ހަރަކާތްތެރިވި ފުލުހުން ބޮޑީ ވޯން ކެމެރާ ބޭނުންކޮށްފައި ނުވާކަން ފުލުހުން ފާހަގަކުރެ އެވެ. ފުލުހުން ބުނީ މި އޮޕަރޭޝަން ހިންގުމުގައި ބާރުގެ ބޭނުން ކުރި ގޮތުގެ ރިވިއުއެއް ހަމަޖެހިފައިވާ އުސޫލުތަކުގެ ތެރެއިން ކުރާނެ ކަމަށެވެ.