ތަކަންދޫ ފެނާއި ނަރުދަމާގެ ނިޒާމްގެ 85 އިންސައްތަ މަސައްކަތް ނިމިއްޖެ

ހއ. ތަކަންދޫ ފެނާއި ނަރުދަމާގެ ނިޒާމްގެ 85 އިންސައްތަ މަސައްކަތް ނިމިފައިވާ ކަމަށް މާލޭ ވޯޓާ އެންޑް ސިވުރެޖް ކޮމްޕެނީ (އެމްޑަބްލިއުއެސްސީ) އިން ބުނެފިއެވެ. އެމްޑަބްލިއުއެސްސީން ބުނީ ތަނަކްދޫގެ ފެނާއި ނަރުދަމާގެ މަސައްކަތުގެ 85 އިންސައްތަ މަސައްކަތް މިހާރު ނިމިފައިވާ ކަމަށެވެ. އަދި މިހާރު ކުރިއަށްދަނީ އިންޓާނަލް ޕައިޕިންނާއި ޕަންޕިން ސްޓޭޝަންގެ އިލެކްޓްރިކަލް އަދި މެކޭނިލަކް މަސައްކަތް ކަމަށް ވެސް އެ ކުންފުނިން ވަނީ ބުނެފައެވެ. އެ މަޝްރޫއުގައި ހިމެނޭ ފެނުގެ ނިޒާމް ގާއިމް ކުރުމުގެ މަސައްކަތުގެ ދަށުން ތަކަންދޫގައި 8.37 ކިލޯމީޓަރގެ ދިގު ފެން ހޮޅީގެ މައި ނެޓްވޯކް ޤާއިމް ކުރުމާއި އާރްއޯ ފެސިލިޓީ ބިލްޑިން އިމާރާތް ކުރުމާއި، ފެން އުފެއްދުމަށްޓަކައި ދެ އާރްއޯ ޕްލާންޓް ބެހެއްޓުމާއި، ފެން ރައްކާކުރުމަށް ޓަކައި ތިން ތާންގި ބަހައްޓަން ވަނީ ނިންމާފައެވެ. މީގެ އިތުރުން، ގޭގޭގައި ފެންމީޓަރ ބަހައްޓައި، ފެނުގެ ކަނެކްޝަން ގުޅައިދީ، ގެތަކަށް ރައްކާތެރި ބޯފެން ފޯރުކޮށްދިނުން ވެސް އެ މަޝްރޫއުގައި ހިމެނެއެވެ. އެ މަޝްރޫއުގައި ހިމެނޭ ނަރުދަމާ ނިޒާމުގެ މަސައްކަތުގެ ދަށުން ތަކަންދޫގައި 6.33 ކިލޯމީޓަރުގެ ދިގު ނަރުދަމާގެ މައި ނެޓްވޯރކް ގާއިމްކުރުމަށާއި، 1.04 ކިލޯމީޓަރގެ ޕަންޕިން ލައިން އެޅުމާއި ތިން ޕަންޕިން ސްޓޭޝަނާއި އަދި އެއް ސީ އައުޓްފޯލް ގާއިމްކުރަން ވަނީ ނިންމާފައެެވެ.