އެމްއެމްޕީއާރުސީގެ އެންމެ ދުވަސްވީ މުއައްޒަފު ވަކިކުރުމުން، ސިނާއަތުގެ ބައެއް މީހުނަށް ހައިރާންކަމެއް!

މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ގެ އެންމެ ދުވަސްވީ އެއް މުއައްޒަފު މަގާމުން ވަކިކުރުމާއި ގުޅިގެން ޓޫރިޒަމް ސިނާއަތުގައި ހަރަކާތްތެރިވާ ބައެއް ފަރާތްތަކަށް ވަރަށްބޮޑު ހައިރާންކަމެއް ލިބިއްޖެއެވެ. ދައުލަތުގެ ހަރަދުތައް ކުޑަކުރުމަށް ސަރުކާރުން ފަށާފައިވާ މަސައްކަތްތަކުގެ ދަށުން ސަރުކާރުން މިއަދު ވަނީ އެމްއެމްޕީއާރުސީގެ ދެ މަޤާމެއް އުވާލައި، އެ ދެ މަޤާމުގައި ތިއްބެވި ބޭފުޅުން ގެއަށް ފޮނުވާލާފައެވެ. މަޤާމު އުވާލައި ވަކިކުރެއްވި ދެ ބޭފުޅުންނަކީ، ޑެޕިއުޓީ މެނޭޖިން ޑިރެކްޓަރުކަމުގެ މަޤާމުގައި ހުންނެވި މުހައްމަދު ބައްސާމް އާދަމާއި، ޑިރެކްޓަރ އޮފް އެޑްމިނިސްޓްރޭޝަން އެންޑް ހިއުމަން ރިސޯސަސް އިބްރާހިމް އާސިމް (އައިބީ) އެވެ. މީގެ ތެރެއިން އައިބީއަކީ ފަތުރުވެރިކަމުގެ ސިނާއަތުގައި ހަރަކާތްތެރިވަމުން އަންނަ ސަރުކާރުގެ އެންމެ ދުވަސްވީ ބޭފުޅުންގެ ތެރޭގައި ހިމެނިވަޑައިގަންނަވާ އެއް ބޭފުޅާއެވެ. އައިބީ މަޤާމުން ވަކުކުރުމާ ގުޅިގެން ރާއްޖޭގެ އެންމެ ގިނަދުވަސްވީ އެއް ޓްރެވަލް އޭޖެންސީ ކެޕިޓަލް ޓްރެވަލް އޭޖެންސީގެ ވެރިޔާ ޔޫސުފް ރިފްއަތު އެކްސްގައި ކުރެއްވި ޕޯސްޓެއްގައި ވިދާޅުވީ، އައިބީ ފަދަ ޓޫރިޒަމް ދާއިރާގައި ގިނަދުވަސްވީ ބޭފުޅަކު މިހާ ކުއްލިގޮތަކަށް ވަކިކުރެއްވުމުން ވަރަށްބޮޑު ހައިރާންކަމެއް ލިބިގެންދިޔަ ކަމަށެވެ. ރިފްއަތު ވިދާޅުވީ އައިބީއަކީ ޓޫރިޒަމް ދާއިރާގެ މީހުންގެ އިހުތިރާމް ލިބިފައިވާ ދާއިރާގެ ތަޖުރިބާކާރެއް ކަމަށެވެ. އައިބީ ވަކިކުރިކަން އެނގުމުން ރާއްޖޭގެ އެންމެ ބޮޑު އެއް ޓްރެވަލް އޭޖެންޓް އިނަމޯލްޑިވްސްގެ ވެރިޔާ މުހައްމަދު ފިރާގުވެސް ވަނީ އައިބީ ވަކިކުރުމުން ހިތާމަކުރާކަމަށް ވިދާޅުވެފައެވެ. މި ބޭބޭފުޅުންގެ އިތުރުންވެސް ފަތުރުވެރިކަމުގެ ސިނާއަތުގައި ހަރަކާތްތެރިވާ ބޭރުގެ ބައެއް ފަރާތްތަކުންވެސް ވަނީ ކުއްލިގޮތަކަށް އައިބީ ވަކިކުރުމުން އެކަން ފާހަގަކޮށްފައެވެ. އެއްވެސް ނޯޓިހެއް ނުދީ އިބްރާހިމް އާސިމް (އައިބީ) އެމްއެމްޕީއާރުސީން ވަކިކޮށްފައިވާއިރު، އޭނާ ޓޫރިޒަމް ދާއިރާގައި ހަރަކާތްތެރިވަމުން އަންނަތާ 34 އަހަރުވެފައިވާކަން ފާހަގަކޮށްލެވެއެވެ.