އެމްއެމްޕީއާރްސީގެ ޑީއެމްޑީ ބައްސާމް މަގާމުން ވަކިކޮށްފި

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ޑެޕިއުޓީ މެނޭޖިން ޑިރެކްޓަރު މުހައްމަދު ބައްސާމު އާދަމް މަގާމުން ވަކިކޮށްފިއެވެ. ބައްސާމް އަކީ އެމްއެމްޕީއާރްސީގެ މެނޭޖިން ޑިރެކްޓަރުގެ މަގާމުގައި ކުރިން ހުންނެވި ފާތުމަތު ތައުފީގު މެއި މަހުގެ ތެރޭގައި މަގާމުން ވަކިކުރުމާ ގުޅިގެން އެމްޑީއަކު އައްޔަންކުރަން ދެން ކުންފުނި ހިންގެވުމުގެ ޒިންމާ ނަންގަމުން ގެންދެވި ބޭފުޅާއެވެ. ނަމަވެސް ދާދިފަހުން އެ ކުންފުނީގެ މެނޭޖިން ޑިރެކްޓަރުގެ މަގާމަށް ވަނީ ޓޭބަލް ޓެނިސް އެސޯސިއޭޝަންގެ ނައިބު ރައީސް އިބްރާހިމް ޝިއުރީ އައްޔަންކޮށްފައެވެ. ބައްސާމަކީ މި އަހަރުގެ ކުރީކޮޅު އެމްއެމްޕީއާރްސީގެ މުވައްޒަފަކަށް ޖިންސީ ފުރައްސާރަކުރިކަމުގެ ތުހުމަތު ކުރެވުނު ބޭފުކެވެ. ބައްސާމްގެ އިތުރުން އެމްއެމްޕީއާރްސީގައި ވަރަށް ގިނަ އަހަރުތަކެއް ވަންދެން މަސައްކަތްކުރެއްވި އިބްރާހީމް އާސިމް ވެސް ވަނީ މަގާމުން ވަކިކޮށްފައެވެ. އެ ބޭފުޅުން ވަޒީފާ އިން ވަކިކުރަން ނިންމިކަން ސަރުކާރުން އެންގީ އިއްޔެއެވެ. އެމްއެމްޕީއާރްސީގެ އެމްޑީގެ މަގާމުގައި މިހާރު ޝިއުރީ ހުންނެވިއިރު، އެ ކުންފުނީގެ ޑިރެކްޓަރުންގެ ބޯޑަށް މި ހަފުތާގެ ތެރޭގައި ވަނީ ދެ ބޭފުޅަކު އައްޔަންކޮށްފައެވެ. އެއީ އަބްދުލް ސަމީއު އިމާދާއި އައިޝަތު ހަމީދެވެ.